ءماجىلىس دەپۋتاتى كونستانتين اۆەرشين قورعانىس ءمينيسترى رۋسلان جاقسىلىقوۆقا جولداعان ساۋالىندا اسكەري سالا ماسەلەسىن كوتەردى، دەپ حابارلايدى اlmaty-akshamy.kz BAQ.KZ-كە سىلتەمە جاساپ.
بۇگىندە قازاقستان قارۋلى كۇشتەرىنىڭ جاعدايى تۋرالى ءارتۇرلى پىكىر بار. جاعداي شيەلىنىسىپ تۇر. وكىنىشكە قاراي، مۇنى اسكەري بورىشىن وتەمەگەن، اسكەري سالاعا قاتىسى جوق «ديۆان ساراپشىلارى» ايتادى. بۇل ماسەلەگە جاۋاپكەرشىلىكپەن قاراپ، بوس سوزگە جول بەرۋگە بولمايدى، - دەپ ايتتى دەپۋتات.
اۆەرشين اتاپ وتكەندەي، حالىق قازاقستان قارۋلى كۇشتەرىندەگى ءىستىڭ جايىنان جاقسى حاباردار بولۋعا ءتيىس. بۇل ۇلتتىق قاۋىپسىزدىك جانە اسكەرگە شاقىرۋشىلاردىڭ ءومىرى مەن دەنساۋلىعىنا تىكەلەي بايلانىستى. سەبەبى ولار دا بىرەۋدىڭ بالاسى، اعاسى مەن تۋىسى.
قورعانىس مينيسترلىگىمەن بىرلەسىپ، «قازاقستاننىڭ جالپىعا بىردەي اسكەري مىندەت جانە اسكەري قىزمەت تۋرالى» زاڭعا سايكەس (كەيىنگە قالدىرۋ نە باسقا دا نەگىزدەر بويىنشا) اسكەري بولىمدەردە ءتيىستى اسكەري-دارىگەرلىك كوميسسيانى وتكەننەن كەيىن اسكەرگە شاقىرىلماعان ازاماتتاردى مەرزىمدى اسكەري قىزمەت وتەۋ شارتتارى نەگىزىندە ەرىكتى تارتىپپەن اسكەردە (1-3 اي) بولۋ مۇمكىندىگىن پىسىقتاۋ قاجەت. بۇل شارا اسكەري قىزمەت تۋرالى شىنايى اقپارات تاراتقىسى كەلەتىن مۇددەلى تۇلعالار، ياعني بلوگەرلەر، جۋرناليستەر، قوعامدىق پىكىر كوشباسشىلارىنا مۇمكىندىك بەرىپ، ولار اسكەردىڭ اتموسفەراسىن سەزىنە الادى. قوعامعا قازاقستان قارۋلى كۇشتەرى قاتارىنان رەپورتاجدار ۇسىنىلادى، - دەپ ايتتى ءماجىلىس دەپۋتاتى.
سونداي-اق بۇل كەز كەلگەن ازاماتقا، ناعىز پاتريوتتارعا ءىس جۇزىندە ەلدىڭ قورعانىس قابىلەتىن نىعايتۋعا ءوز ۇلەسىن قوسۋعا مۇمكىندىك بەرەدى. ولار اسكەري قىزمەتتىڭ بارلىق قيىندىعى مەن اۋىرتپالىعىن سەزىنەدى. دەپۋتاتتىڭ ويىمشا، بۇل ولاردىڭ دۇنيەتانىمىن وزگەرتەدى.
وسىلايشا، اسكەري قىزمەت تۋرالى اقپارات تاراتاتىن تۇلعالاردىڭ جاۋاپكەرشىلىگى دە ارتادى. سونداي-اق بۇل شارا قانداي دا ءبىر جاعدايعا بايلانىستى وتان الدىنداعى بورىشىن وتەمەگەن، قولىنا اۆتومات ۇستاماعان ادامدارعا العاشقى اسكەري دايىندىقتان وتۋگە مۇمكىندىك بەرەدى. قازاقستان قورعانىس مينيسترلىگىنە وسى ماسەلەنى قاراۋدى، نورماتيۆتىك-قۇقىقتىق اكتىلەرگە، قورعانىس مينيسترلىگىنىڭ بۇيرىقتارىنا ءتيىستى وزگەرىستەر ەنگىزۋ تۋرالى ۇسىنىستار دايىنداۋدى، قاجەت بولسا، ازاماتتاردىڭ اسكەري جيىنداردان وتۋىنە قاتىستى جاڭا بۇيرىقتار ازىرلەۋدى ۇسىنامىن، - دەپ ءتۇسىندىردى اۆەرشين.