دەپۋتاتتار مەملەكەتتىك گرانتپەن وقيتىن ستۋدەنتتەرگە مىندەتتى سىناقتى ەنگىزۋدى ۇسىنىپ وتىر، دەپ حابارلايدى aqshamnews.kz.
«بۇگىندە ءبىز وتاندىق ەكونوميكانى دامىتۋ ءۇشىن جۇمىسقا ورنالاسۋدىڭ ورنىنا شەتەلدە قارا جۇمىستى تاڭدايتىن تەحنيكالىق جانە جوعارى ءبىلىمى بار مامانداردى دايىنداپ جاتىرمىز»، - دەپ اتاپ ءوتتى ءماجىلىس دەپۋتاتى يسلام سۇڭقار دەپۋتاتتىق ساۋالىندا.
جالپى، حالىقارالىق كوشى-قون ۇيىمىنىڭ 2023 جىلعا ارنالعان مالىمەتى بويىنشا 193 مىڭ قازاقستاندىق ەڭبەك ميگرانتتارى بولىپ تابىلادى.
ەڭبەك مينيسترلىگىنىڭ مالىمەتى بويىنشا، 2024 جىلى قۇرىلىس سالاسى ەكونوميكانىڭ ەڭ ماڭىزدى سالالارىنىڭ ءبىرى بولدى. ال ءدال وسى سالادا كادر تاپشىلىعى 15 مىڭ ادام، اۋىل، ورمان جانە بالىق شارۋاشىلىعى – 13،5 مىڭ، كولىك جانە قويما شارۋاشىلىعى – 9،4 مىڭ، وڭدەۋشى ونەركاسىپ – 7،4 مىڭ كادر تاپشىلىعى سەزىلەدى.
ول 2019 جىلى قۇرىلىسشىلاردى دايىندايتىن جوعارى وقۋ ورىندارىنا 2900 گرانت، اۋىل، ورمان جانە بالىق شارۋاشىلىعىنا 1،6 مىڭ، كولىك جانە قويما شارۋاشىلىعىنا 4،2 مىڭ جانە ت.ب. گرانت بولىنگەنى جايىندا توقتالىپ ءوتتى.
«ءبىزدىڭ ويىمىزشا، 2019 جىلى وقۋعا تۇسكەن ماماندار 2023 جانە 2024 جىلدارداعى بوس ورىنداردى تولتىرۋى كەرەك ەدى. الايدا، ءبىز مۇنى كورە الماي وتىرمىز. جىل سايىن مەملەكەتتىك ءبىلىم بەرۋ گرانتتارى بولىنسە دە، كادر تاپشىلىعى ازايماي وتىر. كەرىسىنشە، تاپشىلىق ودان سايىن ۇلعايىپ بارادى. وندا بيۋدجەت قاراجاتىن كادرلاردى دايارلاۋعا جۇمساۋدىڭ تيىمدىلىگى قانداي؟»، - دەپ اتاپ ءوتتى دەپۋتات.
قحپ فراكسياسى مەملەكەتتىك تاپسىرىس نەگىزىندە ءبىلىم العان ازاماتتاردى مەنشىك نىسانىنا قاراماستان ءتيىستى سالادا بەيىنى بويىنشا مىندەتتى وقىتۋدى ەنگىزۋدى ۇسىنادى.