تەڭىز جاياۋ اسكەرلەرى بريگاداسىنىڭ 500-دەن استام ساربازى جاۋىنگەرلىك تۋمەن قوشتاستى.
اتىراۋ وبلىسىنداعى سۋ تاسقىنى سالدارىن جويۋعا قاتىسقان 300-دەن استام سارباز قورعانىس ءمينيسترىنىڭ اتىنان قول ساعاتتارىمەن ماراپاتتالدى. قىزمەتتىك مىندەتتەرىن ادال اتقارعانى جانە ۇلگىلى اسكەري ءتارتىبى ءۇشىن ءبىرقاتار اسكەري قىزمەتشىلەردىڭ اتا-انالارىنا العىس حاتتار جولداندى. جەكەلەگەن ساربازدارعا كەزەكتى اسكەري اتاق بەرۋ دە ماڭىزدى ءسات بولدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
تەڭىز جاياۋ اسكەرلەرى بريگاداسىنىڭ كومانديرى پودپولكوۆنيك ازامات سۇلەيمەنوۆ ءبىر جىل ىشىندە اسكەري قىزمەتشىلەردىڭ اسكەري ماماندىقتى مەڭگەرگەنىن، ولاردىڭ كوپشىلىگى جاۋىنگەرلىك جانە مەملەكەتتىك-قۇقىقتىق دايىندىقتا تاماشا ناتيجەگە قول جەتكىزگەنىن اتاپ ءوتتى.
– سىزدەر «بىرلەستىك-2024» حالىقارالىق وقۋ-جاتتىعۋلارىنا، كوكتەمگى سۋ تاسقىنى سالدارىن جويۋعا قاتىستىڭىزدار. ازاماتتاردىڭ قاۋىپسىزدىگىن قامتاماسىز ەتۋگە، ولاردى ەۆاكۋاسيالاۋدى ۇيىمداستىرۋعا جانە گۋمانيتارلىق كومەك جەتكىزۋگە ءوز ۇلەستەرىڭىزدى قوسا بىلدىڭىزدەر، – دەدى بريگادا كومانديرى.
قاتارداعى جاۋىنگەر بەيبارىس سەيىتقاسىم اسكەردەگىبىر جىلعى قىزمەتى تۋرالى ءوز اسەرىن ورتاعا سالۋدى دا ۇمىتپادى.
– اسكەر بىزگە كوپ نارسەنى ۇيرەتتى. كومانديرلەرگە زەيىنى مەن شىدامدىلىعى، اسكەري ءىستى يگەرۋگە كومەكتەسكەنى ءۇشىن العىس ايتقىم كەلەدى. ءبىز مۇنى ەشقاشان ۇمىتپايمىز ءارى جوعارى باعالايمىز، – دەدى ول.
سونىمەن بىرگە 37 تەڭىز جاياۋ اسكەرىنىڭ كەلىسىمشارت بويىنشا قىزمەت ەتۋگە شەشىم قابىلداعانىن دا ايتا كەتۋ كەرەك. زاپاسقا شىعارىلعان 60-تان استام اسكەري قىزمەتشى ءبىلىم بەرۋ جەڭىلدىكتەرىن پايدالانۋعا جانە جوعارى وقۋ ورنىنا وقۋعا تۇسۋگە نيەت ءبىلدىردى.