اتاۋلى الەۋمەتتىك كومەكتى الىپ تاستاۋ ەڭ جاقسى شەشىم بولماق.
قازاقستان حالىق پارتياسىنىڭ ماجىلىستەگى دەپۋتاتتارى اتاۋلى الەۋمەتتىك كومەكتى الىپ تاستاۋدى، ونىڭ ورنىنا اي سايىن ءار بالاعا 70 مىڭ تەڭگە جاردەماقى تولەپ تۇرۋدى ۇسىندى، دەپ حابارلايدى Almaty-akshamy.kz
ءماجىلىس دەپۋتاتى گاۋھار تاناشيەۆانىڭ ايتۋىنشا، اتاۋلى الەۋمەتتىك كومەك كوپ بالالى وتباسىلار ءۇشىن ناقتى كومەك بولىپ تۇرعان جوق.
"قازاقستان حالىق پارتياسىنىڭ فراكسياسى اتاۋلى الەۋمەتتىك كومەكتى الىپ تاستاۋ قاجەت دەپ سانايدى. ااك-كە ۇمىتكەر بولۋ ءۇشىن كوپبالالى، جۇمىس ىستەمەيتىن انالارعا جۇزدەگەن سىناقتان ءوتۋ كەرەك. ادەتتە ايەلدەر بيۋروكراتيا مەن مەملەكەتتىك ورگانداردىڭ اۋرە-سارساڭىنان شارشايدى. ااك-تى الىپ تاستاۋ ەڭ جاقسى شەشىم بولماق. ونىڭ ورنىنا بالالارعا تولەنەتىن جاردەماقىنىڭ مولشەرىن ارتتىرۋ قاجەت"، - دەدى تاناشيەۆا ۆيسە-پرەمەر التاي كولگىنوۆكە جولداعان دەپۋتاتتىق ساۋالىندا.
دەپۋتات ءار بالاعا جۇمساۋعا جەتكىلىكتى مولشەردە ءبىرىڭعاي جاردەماقى تولەۋ قاجەت دەپ سانايدى.
"ءبىز ەڭ تومەنگى جالاقى مولشەرىندە ءار بالاعا ايىنا 70 مىڭ تەڭگە مەملەكەتتىك جاردەماقى تاعايىنداۋدى قاراستىرۋدى ۇسىنامىز. مىسالى، 4 بالاعا بەرىلەتىن جاردەماقى 280 مىڭ تەڭگەنى قۇرايتىن بولادى. ەكى بالاعا 140 مىڭ تەڭگە تاعايىندالادى. ال ءقازىر 4 بالا 55 340 تەڭگە جاردەماقى الادى. ءار بالاعا ايىنا 13 826 تەڭگە بولىنەدى. بۇل الەۋمەتتىك قولداۋدىڭ اقىلعا قونىمسىز مولشەرى. مۇندا ينفلياسيانىڭ تۇراقتى ءوسۋى، ەكونوميكالىق تۇراقسىز جاعداي، باسپانانىڭ جوقتىعى جانە حالىقتىڭ وسى ساناتىنداعى ادامداردىڭ تۇراقتى جۇمىسپەن قامتىلماعانى ەسكەرىلمەگەن"، - دەيدى تاناشيەۆا.
وسىعان بايلانىستى دەپۋتات اتاۋلى الەۋمەتتىك كومەك جانە 18 جاسقا دەيىنگى ءبىرىڭعاي بالالار جاردەماقىسىن ەسەپتەۋ ادىستەمەسىن قاراۋدى سۇرادى.