دەپۋتاتتار «الاش كۇنىن» رەسمي تۇردە بەكىتۋدى سۇرادى

ولار 12 جەلتوقساندى الاش رەسپۋبليكاسىنىڭ قۇرىلعان كۇنى رەتىندە بەكىتۋدى ۇسىندى.

سوننىمەن قاتار «اق جول» فراكسياسى بۇل كۇندى جىل سايىن مەملەكەتتىك دەڭگەيدە اتاپ ءوتۋدى سۇرادى، دەپ حابارلايدى Almaty-akshamy.kz

ءماجىلىس دەپۋتاتى بەرىك دۇيسەنبينوۆ قازاق حاندىعى 1847 جىلى مەملەكەت رەتىندە تاريح ساحناسىنان كەتكەننەن كەيىن اراعا تۋرا 70 جىل سالىپ، 1917 جىلى جەلتوقساندا سول قازاق حاندىعىنىڭ جەر اۋماعىندا الاش ۇلت-ازاتتىق قوزعالىسى زاماناۋي قازاق ۇلتتىق مەملەكەتىنىڭ ىرگەتاسىن قايتا كوتەرگەنىن ەسكە سالدى. سول جىلدىڭ 5-12 جەلتوقسانىندا ورىنبور قالاسىندا وتكەن ەكىنشى جالپىۇلتتىق قازاق-قىرعىز قۇرىلتايىندا الاشوردا ۇلتتىق كەڭەسىن جاساقتاپ، كوپشىلىك داۋىسپەن الاش رەسپۋبليكاسى ۇكىمەتىنىڭ ءتوراعاسى بولىپ ءاليحان بوكەيحانوۆ سايلاندى.

دەپۋتات بيىل الاش رەسپۋبليكاسىنىڭ قۇرىلعانىنا 105 جىل تولعانىن ايتتى. وكىنىشكە قاراي، بۇل تاريحي داتا تاعى دا اتاۋسىز قالدى.

«بۇگىندە تاريحي ادىلدىكتى ورناتاتىن كۇن جەتتى دەپ سانايمىز. تاريح تاعىلىمىن ۇرپاققا ناسيحاتتاۋ ماقساتىندا «اق جول» فراكسياسى الاشتانۋشى عالىمداردىڭ باستاماسىن قولداي وتىرىپ، تاۋەلسىزدىك كۇنى قارساڭىنداعى 12 جەلتوقساندى – تاريحي قۇجاتتارمەن دالەلدەنگەن الاش رەسپۋبليكاسىنىڭ قۇرىلعان كۇنى رەتىندە «الاش كۇنى» دەپ رەسمي بەلگىلەۋدى جانە جىل سايىن مەملەكەتتىك دەڭگەيدە اتاپ ءوتۋدى سۇرايدى»، - دەدى دۇيسەنبينوۆ.