دەپۋتات بۇل جۇيەنىڭ ۇلتتىق قاۋىپسىزدىكتىڭ تامىرىنا بالتا شاباتىنىن ايتتى
ءماجىلىس دەپۋتاتى ەرلان سايروۆ دەپۋتاتتىق ساۋالىندا «كۇندەلىك» جۇيەسىن سىنادى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
«مەملەكەت باسشىسى قاسىم-جومارت توقايەۆ «ۇلاعاتتى ۇرپاق تاربيەلەۋ اسا جاۋاپتى مىندەت» دەپ اتاپ ءوتتى. ەسكى قازاقستاننان بىزگە مۇرا بولىپ قالعان جاستاردى تاربيەلەۋدەگى ولقىلىق قازاقستانىڭ بارلىق مەكتەبىنە كۇشتەپ ەنگىزىلگەن «كۇندەلىك» جۇيەسى. ەلەكتروندى قىزمەت كورسەتە الاتىن ءبىر ەمەس، بىرنەشە وتاندىق كومپانيانىڭ بولۋىنا قاراماستان، ساراپشىلاردىڭ ايتۋىنشا، سول كەزدەگى زامانىن قونىشىنان باسقان توپتاردىڭ قىسىمىمەن قۇزىرلى ورگان 4 ميلليون قازاقستاندىق وقۋشىنىڭ جەكە مالىمەتتەرىن جيناۋ، ساقتاۋ جانە وڭدەۋ قىزمەتىن ەشقانداي ىرىكتەۋ مەن بايقاۋسىز، شەتەلدىك كومپانياعا 12 جىلعا بەرىپ جىبەرگەن»، - دەدى ول.
دەپۋتاتتىڭ ايتۋىنشا، بۇل سالادا شەت ەلدەن باسقارىلاتىن قولدان جاسالعان مونوپوليا پايدا بولدى.
«سىرتقى مونوپوليانىڭ كۇشىمەن قازاقستاننىڭ بارلىق بالالارى، مۇعالىمدەرى مەن اتا-انالارى (جالپى سانى 7 ميلليون ادام) مەملەكەت پايدالانۋعا مىندەتتەگەن «كۇندەلىكتەن» كۇندەلىكتى جاعىمسىز جارناما كورۋگە ءماجبۇر. سونىڭ ىشىندە ەتيكا مەن ۇلتتىق داستۇرگە جات، سانانى ۋلايتىن، جالاڭاشتانعان، ءناپسى مەن ويىننىڭ جارناماسى كوپ. بۇل جونىندە اقپارات قۇرالدارى ۇنەمى دابىل قاعۋدا. مەكتەپ وقۋشىلارىن جاعىمسىز جارناما قاراۋعا مىندەتتەپ، سول ارقىلى شەتەلدىك مونوپوليانى بايىتۋعا جول بەرگەن زاڭ نەمەسە گچپ شارت الەمنىڭ دامىعان بىردە ءبىر ەلىندە جوق. بۇل از بولعانداي، «كۇندەلىك» جۇيەسى «ۇلتتىق اقپاراتتىق تەحنولوگيالار» اتتى مەملەكەتتىك مەكەمەنىڭ سەرۆەرلەرىن پايدالانادى جانە ول ءۇشىن وقۋ-اعارتۋ مينيسترلىگى جىل سايىن 800 ملن تەڭگە قارجى تولەيدى دەگەن اقپاراتتى باس پروكۋراتۋرا تەكسەرۋى قاجەت»، - دەدى سايروۆ.
دەپۋتات «كۇندەلىك» بارلىق مەكتەپتە 2030 جىلعا دەيىن قولدانۋعا مىندەتتى جالعىز ەلەكتروندى جۇيە ەكەنىن ايتتى.
«ەرتەڭ ول مالىمەتتەر جوعالسا، جارناما بەرۋشىلەرگە ساتىلسا نەمەسە استىرتىن زياندى جولمەن قولدانىلسا، كىم جاۋاپ بەرەدى؟ بۇل سالا مونوپوليالىق رەتتەۋگە مۇلدە جاتپايدى، سوندىقتان باسەكەلىستىك بولۋى شارت. ال «كۇندەلىك» بۇگىندە جاساندى مونوپوليا. جاقىندا تۋرا وسىنداي شەتەلدىك قىزمەت بولىپ تابىلاتىن «ياندەكس تاكسيدەگى» ەرەسەكتەردىڭ جەكە مالىمەتتەرى ماسەلەسى قوعامدا قىزۋ تالقىلاندى. ال «كۇندەلىك» ءبىزدىڭ بالالارىمىزدىڭ جەكە مالىمەتتەرىنە قول سۇعىپ، رۋحاني كەلبەتىنە كەرى اسەر ەتەتىن، ۇلتتىق قاۋىپسىزدىكتىڭ تامىرىنا بالتا شابۋعا قابىلەتتى تەرەڭ پروبلەما. بالالاردىڭ ساناسى مەن ۇلتتىڭ ەرتەڭىنە تونگەن ءقاۋىپتى ەسكەرىپ، ۇكىمەتتەن شۇعىل ارەكەت ەتۋى قاجەت. جول بەرىلگەن قاتەلىكتى جوندەپ، بالالاردىڭ جەكە مالىمەتتەرىن مەملەكەتكە قايتارىپ، سالادا قالىپتاسقان شەتەلدىك جاساندى مونوپوليانى بۇزىپ، وتاندىق كومپانيالار اراسىنداعى ەركىن باسەكەلەستىككە جول اشۋ زامان تالابى»، - دەدى ول.