ق ر دەنساۋلىق ساقتاۋ ءمينيسترى اقمارال ءالنازاروۆا ۇكىمەت وتىرىسىندا مەكتەپ مەديسيناسىن جاڭعىرتۋ، مەكتەپتەگى تاماقتانۋ ساپاسىن ارتتىرۋ جانە بالالار لاگەرلەرىندەگى سانيتاريالىق-ەپيدەميولوگيالىق قاۋىپسىزدىكتى قامتاماسىز ەتۋ شارالارى تۋرالى باياندادى.
مەديسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ ماقساتىندا مەكتەپ مەديسيناسىندا مەيىرگەرلەردىڭ ءرولى كۇشەيتىلۋدە، دەپ حابارلايدى aqshamnews.kz.
ماسەلەن، مەيىرگەرلەردىڭ جۇكتەمەسىن ازايتۋ (ءبىر مولشەرلەمە 700 ەمەس، 500 وقۋشىدان كەلەتىندەي) جوسپارلانىپ وتىر، وقۋشى سانى 1000-نان اساتىن ءىرى مەكتەپتەردە ستوماتولوگيالىق اۋرۋلاردىڭ پروفيلاكتيكاسىنا ارنالعان ارنايى كابينەتتەر اشىلادى. سونىمەن قاتار، مەديسينالىق تەكسەرۋ جانە مەديسينا قىزمەتكەرلەرىنىڭ بىلىكتىلىگىن ارتتىرۋ ءتارتىبى قايتا قارالۋدا.
دەنساۋلىق ساقتاۋ مينيسترلىگى مەكتەپتەگى تاماقتانۋ ستاندارتىن قايتا قارادى جانە ول بيىلعى 1 قىركۇيەكتەن باستاپ كۇشىنە ەنەدى. حالىقارالىق ۇسىنىمدارعا سايكەس ازىرلەنگەن تيپتىك ءمازىر بالالار ورگانيزمىنىڭ فيزيكالىق جانە اقىل-وي دامۋىنا پايدالى بولماق.
بۇل ستاندارت ەلدەگى بارلىق ءبىلىم بەرۋ جانە مەكتەپكە دەيىنگى ۇيىمدارعا قولدانىلادى. اسحاناسى جوق شاعىن جيناقتى مەكتەپتەر ءۇشىن جەكە شەشىمدەر قابىلدانادى. جاڭا ەرەجەگە سايكەس، قانت مولشەرى 3،6 ەسە، ال تۇز 5 ەسەگە دەيىن قىسقارتىلادى. مەكتەپتەگى تاماقتانۋعا قاناعاتتانۋشىلىق دەڭگەيىن باعالاۋ ءۇشىن جەلىنبەي قالاتىن تاعام يندەكسى ەنگىزىلەدى.
كۇتىلەتىن ناتيجە — ينفەكسيالىق ەمەس اۋرۋلاردىڭ، اتاپ ايتقاندا، بالالار سەمىزدىگى 15%-عا، قانت ديابەتى 20%-عا، ارتەريالىق گيپەرتەنزيا 18%-عا دەيىن، باسقا سوزىلمالى اۋرۋلار 15%-عا دەيىن تومەندەۋى مۇمكىن.
بيىل 191 مەكتەپ، سونىڭ ىشىندە 54 مەكتەپ اسحاناسىنىڭ سانيتاريالىق قاعيدالار مەن گيگيەنالىق نورماتيۆتەرگە سايكەستىگى تۇرعىسىنان تەكسەرىلدى. تەكسەرۋ بارىسىندا اپاتتى جاعدايداعى عيماراتتار، سانيتاريالىق-ەپيدەميولوگيالىق قورىتىندىلاردىڭ بولماۋى، مەكتەپتەردىڭ شامادان تىس تولتىرىلۋى، سانيتاريالىق-تەحنيكالىق جاعدايدىڭ ناشارلىعى جانە باسقا دا كەمشىلىكتەر انىقتالدى. ناتيجەسىندە 150 نۇسقاما بەرىلىپ، 12 ملن تەڭگەدەن استام ايىپپۇل سالىندى، 31 ادام جۇمىستان شەتتەتىلىپ، 6 ءىس سوتقا بەرىلدى.
مەكتەپتەگى تاماقتانۋ قاۋىپسىزدىگىن قامتاماسىز ەتۋ ماقساتىندا دەنساۋلىق ساقتاۋ مينيسترلىگى ءبىلىم بەرۋ نىساندارىنداعى مەملەكەتتىك باقىلاۋدى كۇشەيتىپ جاتقانىن ايتا كەتكەن ءجون.
تۇزەتۋلەر بالالار بولاتىن نىساندارعا ەرەكشە مارتەبە بەرۋ، تەكسەرۋ تۋرالى الدىن الا حابارلاۋ ءراسىمىن الىپ تاستاۋ جانە نىسانداردى سانيتاريالىق-ەپيدەميولوگيالىق تالاپتارعا سايكەستەندىرۋ ءۇشىن مونيتورينگتىك ساپارلار جۇيەسىن ەنگىزۋدى كوزدەيدى.
جازعى دەمالىس كەزىندە بالالار لاگەرلەرىنىڭ سانيتاريالىق-ەپيدەميولوگيالىق قاۋىپسىزدىگى قامتاماسىز ەتىلەدى.
«ءاربىر لاگەر، ونىڭ ىشىندە شاتىرلى لاگەرلەر دە ماۋسىم باستالعانعا دەيىن سانيتاريالىق-ەپيدەميولوگيالىق قورىتىندى الۋعا مىندەتتى. 2024 جىلى لاگەرلەردىڭ 19%-ى (37 لاگەر) دايىندىقتى ۋاقىتىندا اياقتاي المادى جانە بالالاردى قابىلداۋدى باستاي المادى. جازعى كەزەڭدە بالالاردىڭ سانيتاريالىق-ەپيدەميولوگيالىق قاۋىپسىزدىگىن قامتاماسىز ەتۋ ماقساتىندا ءار ماۋسىمدىق لاگەرگە سانيتاريالىق-ەپيدەميولوگيالىق قىزمەت ماماندارى بەكىتىلدى، لاگەر باسشىلىعىمەن ءاقپاراتتىق-تۇسىندىرۋ جۇمىستارى جۇرگىزىلۋدە، سانيتاريالىق-ەپيدەميولوگيالىق باقىلاۋ كوميتەتىندە قىزۋ جەلى ۇيىمداستىرىلدى»، — دەدى ا. ءالنازاروۆا.
دەنساۋلىق ساقتاۋ مينيسترلىگى اتا-انالاردى رەسمي تىركەلگەن لاگەرلەردى تاڭداۋعا شاقىرادى — ولاردىڭ ءتىزىمى https://www.gov.kz/memleket/entities/ksek؟lang=ru سايتىندا قولجەتىمدى.