بۇل تۋرالى ۇكىمەتتە وتكەن باسپا ءسوز ءماسليحاتى بارىسىندا وقۋ-اعارتۋ ءمينيسترى عاني بەيسەمبايەۆ ايتتى، دەپ حابارلايدى aqshamnews.kz
مينيستر جەر-جەردە اتا-انالاردان، اكىمدىكتەردەن كوپ شاعىم ءتۇسىپ جاتقانىن ايتادى.
"جەكەمەنشىك مەكتەپتەردىڭ اشىلۋىنا قاتىستى بەيبەرەكەت تىرلىكتىڭ بولىپ جاتقانى، مەكتەپ ورنى جەتكىلىكتى اۋدانعا مەكتەپ اشۋ جاعدايلارى، ماتەريالدىق-تەحنيكالىق تۇرعىدان تولىق جابدىقتاماي، اقشا تابۋ ماقساتىمەن عانا جۇمىس ىستەۋ فاكتورلارى بويىنشا شاعىمدار تۇسەدى"، دەيدى ول.
بەيسەمبايەۆتىڭ سوزىنشە، ءبىر كەزدەرى جەكەمەنشىك مەكتەپ سانى 100 بولسا، ءقازىر 900-گە دەيىن كوبەيگەن. سول سەبەپتى ءقازىر مەكتەپتەردەگى ءبىلىم ساپاسىنا باقىلاۋ ورناتۋ ماسەلەسى وزەكتى بولا تۇسكەن. ال كەيىنگى ءۇش جىلدا جەك مەنشىك مەكتەپتەردى مەملەكەتتەن قولداۋ كولەمى 35 ملرد تەڭگەدەن 330 ملرد تەڭگەگە دەيىن ارتقان.
جەكەمەنشىك مەكتەپتەردىڭ قۇرىلتايشىلارىمەن، قاۋىمداستىعىمەن كەزدەسىپ، ساپا تۋرالى اڭگىمە قوزعاپ وتىرمىز. مەكەمە جەكە مەنشىك بولعانىمەن، بالا جەكە مەنشىك ەمەس. بالالاردىڭ بىلىمىنە، قاۋىپسىزدىگىنە كەز كەلگەن مەكەمە جاۋاپتى. ونى قاداعالاۋدى وزىمىزگە مىندەت ەتىپ الىپ وتىرمىز. ول بولجامدارمەن كەلىسەم، جەكە مەنشىك مەكتەپتەردىڭ ۇلەسى 5% دەيىن كەمۋى مۇمكىن. ءتيىستى جابدىقتارمەن جابدىقتالماسا سولاي بولادى. جوعارى اۋديتورلىق پالاتانىڭ تەكسەرۋىندە ءمالىم بولدى، جەرتولەدە دە مەكتەپ اشۋعا ۇمتىلعان ادامدار بار. ونداي مەكتەپتەر، ارينە، جابىلادى. جەكە مەنشىك مەكتەپتەر قاجەتتىلىك تۋىنداعان جەرلەردە عانا اشىلۋ كەرەك. ونداي مەكتەپتەردى قولداۋعا دايىنبىز. ءقازىر جەكە مەنشىك مەكتەپتەرمەن بىرلەسىپ تەكسەرۋ جۇرگىزىپ، زاڭسىزدىقتاردىڭ ستاتيستيكاسىن انىقتايمىز، - دەدى بەيسەمبايەۆ.