توتەنشە جاعدايلار مينيسترلىگى بالالاردىڭ قاۋىپسىزدىگىنە بايلانىستى الاڭداۋشىلىق ءبىلدىرىپ وتىر، دەپ حابارلايدى aqshamnews.kz
"جىلى مەزگىلدىڭ باستالۋىمەن، سونداي-اق جازعى مەكتەپ دەمالىسى كەزىندە جىل سايىن وسىنداي وقيعالار سانى ارتادى. جىل باسىنان باستاپ تجم ستراتەگيالىق جوسپارلاۋ جانە جەدەل باسقارۋ كوماندالىق ورتالىعىنا بالالاردىڭ تەرەزەدەن قۇلاۋىنا بايلانىستى 60 جازاتايىم وقيعا (19.05.2025 جىلعى جاعداي بويىنشا) تۋرالى اقپارات كەلىپ ءتۇستى. بەس بالا وقيعا ورنىندا قايتىس بولدى، 55 بالا ءتۇرلى جاراقات الىپ، مەديسينالىق مەكەمەلەرگە جەتكىزىلدى"، – دەيدى توتەنشەلىكتەر.
2024 جىلى وسىنداي 196 وقيعا تىركەلگەن. ەرەسەكتەردىڭ قاراۋىنسىز قالعان 2 جاستان 13 جاسقا دەيىنگى بالالار كوپ. كوبىنە قايعىلى وقيعالار بالالار موسكيت تورلارىنا سۇيەنگەن كەزدە بولادى، سەبەبى بۇل تورلار ارتىق سالماققا شىدامايدى.
قازىرگى ۋاقىتتا، ۆەدومستۆو باسشىسىنىڭ تاپسىرماسىمەن ەلىمىزدىڭ بارلىق وڭىرىندە پروفيلاكتيكالىق جۇمىستار كۇشەيتىلگەن. قۇتقارۋشىلار، اتا-انالارمەن كەزدەسۋ كەزىندە جانە بالالار مەكەمەلەرىندە رەيدتەر، پروفيلاكتيكالىق ءىس-شارالار وتكىزەدى.
توتەنشە جاعدايلار مينيسترلىگى بارلىق اتا-انالار مەن بالالاردىڭ زاڭدى وكىلدەرىن قاۋىپسىزدىك شارالارىن قاتاڭ ساقتاۋعا شاقىرادى:
بالالاردى قاراۋسىز قالدىرماڭىز؛
موسكيت تورلارىنا سەنبەڭىز، ولار بالانى ۇستاپ قالمايدى؛
تەرەزەلەرگە ارنايى بەكىتكىشتەر مەن بلوكاتورلاردى ورناتىڭىز؛
بالا تەرەزە الدىنا شىعا الماس ءۇشىن، تەرەزە ماڭىنداعى جيھازداردى الىپ تاستاڭىز.