قازاقستاندا "نازار اۋدارىڭىز، بالالار!" جەدەل-پروفيلاكتيكالىق ءىس-شاراسى باستالدى، دەپ حابارلايدى aqshamnews.kz Polisia.kz-كە سىلتەمە جاساپ.
بۇگىنگى تاڭدا ەلدەگى كامەلەتكە تولماعانداردىڭ قاتىسۋىمەن بولاتىن جول اپاتى وقيعالارى ءتارتىپ ساقشىلارىن ەرەكشە الاڭداتىپ وتىر. جىل سايىن جول-كولىك وقيعاسىنىڭ سالدارىنان 300-دەن استام بالا قازا تاۋىپ، ءتورت مىڭنان استامى ءتۇرلى جاراقات الادى. بۇل قوعام ءۇشىن ەلدىڭ دەموگرافيالىق رەزەرۆىنە نۇقسان كەلتىرەتىن ورنى تولماس شىعىن.
"وسى جىلدىڭ العاشقى ءتورت ايىندا رەسپۋبليكا اۋماعىندا بالالاردىڭ قاتىسۋىمەن ەكى مىڭنان استام اپات تىركەلدى. سالدارىنان 67 بالا قازا تاۋىپ، ءۇش مىڭعا جۋىعى جاراقات الدى"، - دەيدى پوليسەيلەر.
پوليسيا الداعى جازعى دەمالىستى ەسكەرە وتىرىپ، جول قاۋىپسىزدىگى ماسەلەلەرىندە بەلسەندىلىك پەن جاۋاپكەرشىلىك تانىتۋعا شاقىرادى.
"ءبىز بالالاردىڭ قاتىسۋىمەن بولاتىن جول اپاتىنىڭ الدىن الۋعا باعىتتالعان بىرلەسكەن جۇمىس جۇرگىزۋ ءۇشىن بارلىق رەسۋرستى پايدالانۋىمىز قاجەت. وسىعان بايلانىستى ەلىمىزدە "نازار اۋدارىڭىز، بالالار!" اكسياسى وتكىزىلەدى. بۇل اكسيا بالالاردىڭ جولداعى قاۋىپسىزدىگىنە قوعامنىڭ نازارىن اۋدارۋعا باعىتتالعان"، - دەلىنگەن حابارلامادا.