«قازاقستاننىڭ حح عاسىرداعى جانە قازىرگى زامانعى ساندىك-قولدانبالى ونەرى» كاتالوگى – اتالعان ونەر مۋزەيىنىڭ قورىنداعى ساندىك-قولدانبالى ونەر تۋىندىلارىنىڭ العاش رەت تولىق كولەمدە ۇسىنىلعان باسىلىمى. 1938 جىلدان 2024 جىلعا دەيىنگى كەزەڭدى قامتيتىن بۇل وتاندىق ونەر تاريحىندا ماڭىزدى كوركەمدىك قۇبىلىس بولىپ تابىلاتىن تۋىندىلار قورى شامامەن سەگىز جۇزگە جۋىقتايدى.
كوللەكسيانىڭ قالىپتاسۋ جىلدارىندا شىعارماشىلىقپەن بەلسەندى اينالىسقان سۋرەتشىلەردىڭ قاتارىندا ءابىلحان قاستەيەۆ، نيكولاي سيۆچينسكيي، الەكساندر ريتتيح، شاجات وسپانوۆتاردى اتاۋعا بولادى. ولاردىڭ ەسكيزدەرى بويىنشا «كىلەمشى» ارتەلىنىڭ شەبەرلەرى العاشقى قازاقستاندىق گوبەلەندەردى جاساپ، بۇل ەڭبەكتەر «ماڭگىلىك مۇرا – ۋاقىتپەن ۇندەسكەن ونەر» كورمەسىندە كەڭىنەن ۇسىنىلادى.
«مەنىڭ ويىمشا، قازاقستاننىڭ حح عاسىرداعى جانە قازىرگى زامانعى اۆتورلاردىڭ ساندىك-قولدانبالى ونەرىنىڭ تولىق كوللەكسياسىن العاش رەت كورسەتەتىن عىلىمي كاتالوگتىڭ شىعارىلۋى وسى باعىتتى ءارى قاراي زەرتتەۋدىڭ نەگىزى بولىپ تابىلادى. جاس سۋرەتشىلەر مەن ونەرتانۋشىلار ءۇشىن ءوز داعدىلارىن جەتىلدىرۋگە شابىت كوزى بولادى. ءبىز ءۇشىن بۇل باسىلىمنىڭ جارىققا شىعۋى قازاقستان رەسپۋبليكاسىنداعى جەتەكشى كوركەم ونەر مۋزەيىنىڭ 90 جىلدىعىمەن جانە «ۇلتتىق» مارتەبەسىن الۋىمەن تۇسپا تۇس كەلۋى قۋانتارلىق ءجايت. ارينە، مۋزەي كوللەكسيانى تولىقتىرۋ، كەڭەيتۋ، زەرتتەۋمەن قاتار، ناسيحاتتاۋ ءۇشىن بارلىق كۇش-جىگەرىن جۇمسايدى. ونى ۇرپاقتارعا ساقتاپ، مادەني مۇرانىڭ جاندانعان ساباقتاستىعىن قامتاماسىز ەتۋ ءۇشىن جاعداي جاسايتىنى انىق»، – دەيدى ءابىلحان قاستەيەۆ اتىنداعى ق ر مەملەكەتتىك ونەر مۋزەيىنىڭ ديرەكتورى گ.جۇمابەكوۆا.
ەكسپوزيسياعا ەلىمىزدىڭ تانىمال كاسىبي ساندىك-قولدانبالى ونەر شەبەرلەرى جاساعان 90-عا جۋىق تۋىندى ۇسىنىلعان. ولاردىڭ اراسىندا كىلەمدەر، گوبەلەندەر، كيىز، كەستە پاننولار جانە تەرى، اعاش، مەتالل جانە تاس، قىش، فارفور، شىنىدان جاسالعان كوركەم زاتتار، سونداي-اق مەلحيور مەن كۇمىستەن جاسالعان اۆتورلىق زەرگەرلىك بۇيىمدار بار. «ماڭگىلىك مۇرا – ۋاقىتپەن ۇندەسكەن ونەر» كورمەسى مەن ايتۋلى كاتالوگتىڭ تۇساۋكەسەرىندە تانىمال قازاقستاندىق ديزاينەر ايجان ءابدۋبايتتىڭ «زەر-عۇمىر» كيىم كوللەكسياسى كورسەتىلدى.
