ق ر دەنساۋلىق ساقتاۋ مينيسترلىگى ونكولوگيامەن كۇرەس بويىنشا 2023-2027 جىلدارعا ارنالعان كەشەندى جوسپار شەڭبەرىندە ەل وڭىرلەرىندە ساۋلەمەن ەمدەۋگە باعىتتالعان جابدىقتار پاركىن جاڭارتۋدا.
اتوم ەنەرگياسى جونىندەگى حالىقارالىق اگەنتتىك (اەحا) ۇسىنىمدارىنا سايكەس ساۋلەمەن ەمدەۋ ونكولوگيالىق اۋرۋلارى بار ناۋقاستاردىڭ 60-70%-ىن قامتۋى كەرەك. قازاقستاندا بۇل كورسەتكىش 30،6%-عا تەڭ، دەپ حابارلايدى aqshamnews.kz ق ر دەنساۋلىق مينيسترلىگىنە سىلتەمە جاساپ.
ومىرلىك قاجەتتى تەراپياعا قولجەتىمدىلىكتى ارتتىرۋ ءۇشىن "قازاقستان حالقىنا" قايىرىمدىلىق قورىمەن بىرگە 16 زاماناۋي جەلىلىك جەدەلدەتكىش ساتىپ الىپ، ورناتۋ تۋرالى ماسەلە قارالۋدا. بۇل ناۋقاستاردى ەمدەۋمەن قامتۋ دەڭگەيىن ايتارلىقتاي ارتتىرۋعا جانە ونى حالىقارالىق ستاندارتتارعا جاقىنداتۋعا سەپتىك ەتەدى.
بۇگىنگى تاڭدا ەلىمىزدە 10 وڭىردە جۇمىس ىستەيتىن 15 جەلىلىك جەدەلدەتكىشتى قوسا العاندا ساۋلەمەن ەمدەۋگە ارنالعان 32 اپپارات قويىلىپ ۇلگەردى. قازىرگى ۋاقىتتا الماتى، استانا قالالارى مەن اباي، سولتۇستىك قازاقستان جانە قاراعاندى وبلىستارى سياقتى وڭىرلەردە جاڭا جابدىقتاردى ورناتۋ اياقتالدى. جاڭا قوندىرعىلار اراسىندا باپتاۋلارى جاسالعان، قازاق ونكولوگيا جانە راديولوگيا عىلىمي- زەرتتەۋ ينستيتۋتى مەن استاناداعى كوپفۋنكسيونالدى مەديسينالىق ورتالىعى سياقتى جەتەكشى مەديسينالىق مەكەمەلەرگە بەرۋگە دايىندالىپ جاتقان Ethos Varian جانە TrueBeam Varian دەگەن زاماناۋي مەديسينالىق جەدەلدەتكىشتەر بار.
سونىمەن قاتار ەل اۋماعىندا ءار ءتۇرلى وڭىرلەردە ورنالاسقان 7 پەت-ورتالىق جۇمىس ىستەيدى، بيىل الماتىدا بىرەۋى شاعىن سيكلوترونمەن جابدىقتالعان تاعى ەكى جەكە پەت-ورتالىق جۇمىسىن باستادى.
3D-كونفورلى ساۋلە تەراپياسى، قارقىندى مودۋلدەنەتىن تەراپيا (IMRT VMAT) جانە ستەرەوتاكسيكالىق راديوحيرۋرگيا سياقتى ەڭ جاڭا ادىستەردى ەنگىزۋدىڭ ارقاسىندا ەمدەۋ اناعۇرلىم ناقتى جانە ءتيىمدى بولا تۇسەدى. بۇل تەحنولوگيالار جاناما تەرىس اسەردى ازايتىپ، پاسيەنتتەردىڭ ءومىر ساپاسىن ارتتىرادى. سوعان قوسا جاڭا ادىستەردىڭ ارقاسىندا ەمدەۋ كۋرسىنىڭ ۇزاقتىعى قىسقارىپ، ونىڭ تيىمدىلىگى ىسىكتىڭ ءتۇرى مەن ورنالاسقان جەرىنە قاراي ارتادى.
دەسەك تە، الماتى، اقمولا، تۇركىستان، ۇلىتاۋ سياقتى باسقا دا وبلىستاردا ءالى دە بولسا ساۋلەمەن ەمدەۋگە قاجەت جابدىقتار جوق. بۇگىندە "قازاقستان حالقىنا" قورى 2025 جىلعا دەيىن 5 جەلىلىك جەدەلدەتكىش ساتىپ الۋ تۋرالى شەشىم قابىلدادى. قوردىڭ بۇل قولداۋى ەمدەۋدىڭ زاماناۋي ادىستەرىنە قولجەتىمدىلىكتى ارتتىرىپ، ەلدەگى مەديسينالىق كومەك ساپاسىن جاقسارتۋعا ىقپال ەتەدى.
دەنساۋلىق ساقتاۋ مينيسترلىگى ونكولوگيالىق اۋرۋلارمەن كۇرەسۋ جانە ءولىم-جىتىمدى ازايتۋ ءۇشىن جابدىقتاردى جاڭعىرتۋ جانە جاڭا تەحنولوگيالاردى ەنگىزۋ ءىسىن جالعاستىرا بەرەدى.