الماتىلىق تالاپكەر مەدينا مايسار عىلىم جانە جوعارى ءبىلىم مينيسترلىگىن سوتقا بەردى.
مەدينا مايسار جوعارى بالل السا دا، گرانتقا تۇسپەي قالعانىنا، ال ودان تومەن العاندار گرانتقا ىلىگىپ كەتكەنىنە نارازى، دەپ حابارلايدى aqshamnews.kz.
"كەشە ءبىرىنشى تالاپكەر عىلىم مينيسترلىگىنە اكىمشىلىك شاعىم ءتۇسىردى. وكىنىشتىسى، مينيسترلىك ءالى كۇنگە دەيىن ءوز قاتەسىن مويىنداماي، زاڭعا قايشى كەلىپ، توتەنشە كۆوتا ەنگىزۋگە قۇقىعى بارداي سىڭاي تانىتىپ وتىر"، – دەيدى زاڭگەر حاليدا ءاجىعۇلوۆا.
ونىڭ ايتۋىنشا، مەكتەپ ءبىتىرىپ، مەملەكەتتىك گرانتقا يە بولا الماي قالعان 200-دەن استام بالا كومەك سۇراپ كەلگەن.
ءىس ءالى سوتقا جەتكەن جوق. ءاجىعۇلوۆا ونداعان بالانىڭ سوتقا شاعىمدانۋعا نيەتتى ەكەنىن اتاپ ءوتتى. وسىعان دەيىن مەدينا مايسار پرەزيدەنتكە ۇندەۋ جولداپ، عىلىم جانە جوعارى ءبىلىم ءمينيسترى ساياسات نۇربەكتى قىزمەتىنەن بوساتۋدى سۇراعان ەدى.
مينيسترلىك ارنايى بايلانىس ورتالىعىن ىسكە قوستى. وندا قوسىمشا ءبىلىم گرانتتارى تۋرالى بارلىق قاجەت اقپاراتتى الا الاسىز. 10 مىڭ گرانتتىڭ 3 مىڭىن ەلىمىزدىڭ جەتەكشى جوعارى وقۋ ورىندارى، 2 مىڭعا جۋىعىن جۇمىس بەرۋشىلەر مەن "قازاقستان حالقى" قورى، قالعانىن وبلىس اكىمدىكتەرى بولەدى. سودان كەيىن مينيسترلىك تاعى 10 مىڭ گرانت بولەتىنىن مالىمدەدى.
ەسكە سالساق، جەلىدە تۇلەكتەر جوو-عا ءتۇسۋ گرانتىنىڭ باسىم بولىگى سۋ تاسقىنىنان زارداپ شەككەندەرگە بەرىلگەنىنە قارسى شىققان ەدى. ولار پەتيسيا جاريالاپ، مينيسترلىكتى سوتقا بەردى.