دارىگەرلەرگە مەدبيكەلەردىڭ كومەگى ءارقاشان قاجەت
12 مامىر - مەيىربيكە ءىسىنىڭ ماماندارى وزدەرىنىڭ كاسىبي مەرەكەلەرىن اتاپ وتەدى. مەرەكە قارساڭىندا الماتىنىڭ وڭىرلىك كوممۋنيكاسيالار قىزمەتىنىڭ الاڭىندا دەنساۋلىق ساقتاۋ ارداگەرى گۇلشارا ۋرمۋرزينا ءسوز سويلەدى.
بۇل كۇن حالىقارالىق قىزىل كرەست كوميتەتىنىڭ شەشىمىمەن مەيىربيكە ءىسىنىڭ نەگىزىن قالاۋشى ايگىلى اعىلشىندىق فلورەنس نايتينگەيلدىڭ تۋعان كۇنىنە وراي تاڭدالدى. جىل سايىن حالىقارالىق مەيىربيكەلەر كەڭەسى كەلىسە وتىرىپ، ءوز ۇراندارىن تاڭدايدى. بيىلعى جىلعى مەرەكە "مەدبيكەلەر – ماماندىقتىڭ بولاشاعى" ۇرانىمەن وتەدى.
"مەدبيكەلەردىڭ دەنساۋلىق ساقتاۋ سالاسىنىڭ دامۋىنا قوسقان ۇلەستەرى وراسان زور. كوريفەيلەر مەدبيكەنىڭ ءۇش قابىلەتكە يە بولۋى كەرەكتىگىن بەكەر ايتپاعان. ءبىرىنشىسى - كاسىبيلىك، ەكىنشىسى - تەحنيكالىق ەپتىلىك، ءۇشىنشىسى - شىنايىلىق. مەيىربيكە يىعىنا تۇسەتىن بارلىق جاۋاپتى جۇمىستى ورىنداي الۋى قاجەت. قاراپايىم جۇمىستان باستاپ وپەراسيا جاسايتىن حيرۋرگتىڭ كومەكشىسى رەتىندە وتە كۇردەلى مانيپۋلياسيالارعا دەيىن ءبىلۋى كەرەك"، - دەپ ءبولىستى ءوز ويىن گ.ۋرمۋرزينا.
مەديسينالىق مەكەمەلەردەگى جۇمىستىڭ ۇلكەن جانە جاۋاپتى بولىگى مەدبيكەلەردىڭ موينىندا. سپيكەردىڭ ايتۋىنشا، ولار كەز-كەلگەن مەديسينالىق مەكەمەدەگى تاپتىرماس قىزمەتكەرلەر بوپ سانالادى.
"دارىگەرلەرگە مەدبيكەلەردىڭ كومەگى ءارقاشان قاجەت. مەن العاش بالالار كلينيكالىق اۋرۋحاناسىنىڭ باس دارىگەرى بولىپ جۇمىس ىستەگەنىمدە، باس مەدبيكە ابابكوۆا ماييا الەكساندروۆنا بولدى. مەن ودان كوپ نارسەنى ۇيرەندىم. ول بارلىق دارىگەرلەرمەن، ورتا مەديسينا قىزمەتكەرلەر جانە تەحنيكالىق قىزمەتكەرلەرمەن ءتىل تابىسا الاتىن. بىزگە كۇندەلىكتى، ساعات سايىن، مينۋت سايىن قاجەت ادامنىڭ ءبىرى وسى كىسى بولاتىن. دەنساۋلىق ساقتاۋدىڭ قاي سالاسىندا بولماسىن، ءوز ۇلەسىن قوسقان مەدبيكەلەرىمىزدى ماقتان تۇتامىن. بارشا مەيىربيكەلەردى ءتول مەرەكەلەرىمەن قۇتتىقتايمىن!"، - دەپ قورىتىندىلادى.
ايتا كەتسەك، گ.ۋرمۋرزينانىڭ باسشىلىعىمەن الماتىدا العاش رەت بالالار ستوماتيكالىق ساناتورييلەرى، ارالاس ەمحانالار، مەيىربيكەلىك كۇتىم اۋرۋحاناسى، پەريناتالدىق ورتالىق، ادام ۇرپاعىن ءوربىتۋ ورتالىقتارى اشىلدى. الماتى قالاسىنىڭ پەرزەنتحانالارىندا انا مەن بالانىڭ بىرگە بولۋ جۇيەسى ەنگىزىلدى. ەمدەۋ مەكەمەلەرىنىڭ ماتەريالدىق بازاسىن دامىتۋعا جانە نىعايتۋعا، جۇمىس پەن كادرلار دايارلاۋدىڭ جاڭا نىساندارى مەن ادىستەرىن ەنگىزۋ ۇدەرىستەرىنە ۇلكەن ۇلەس قوستى.
گۇلشارا ۋرمۋرزينا "ۇلتتىق مەديسينالىق اسسوسياسياسى" رەسپۋبليكالىق قوعامدىق بىرلەستىگىنىڭ جوعارعى ناگراداسى – "التىن دارىگەر" توسبەلگىسىنىڭ جانە "Ave Vitae"وردەنىنىڭ يەگەرى. وسى ۋاقىتقا دەيىن رەسپۋبليكالىق دەڭگەيلەردە قوعامدىق جۇمىستارعا بەلسەندى اتسالىسىپ، الماتى قالاسىنىڭ قوعامدىق-ساياسي ومىرىنە بەيجاي قارامايتىن ۇلكەن جۇرەكتى مامان.