قوعامدىق دەنساۋلىق ساقتاۋ باسقارماسى مەيىربيكە قىزمەتكەرلەرىنىڭ بىلىكتىلىگىن ارتتىرۋعا قولداۋ كورسەتەدى
بۇل تۋرالى وكق الاڭىندا مەيىربيكە ءىسىن دامىتۋ جونىندەگى ۇيلەستىرۋشىسى، №18 قالالىق ەمحاناسى مەيىربيكە ءىسىنىڭ ارداگەرى ماييا ابابكوۆا مەن ۇيلەستىرۋ كەڭەسى ءتوراعاسىنىڭ ورىنباسارى، الماتى قالاسى قوعامدىق دەنساۋلىق ساقتاۋ باسقارماسىنىڭ شتاتتان تىس باس مەيىربيكەسى، №10 قالالىق ەمحانانىڭ باس مەيىربيكەسى گۇلنار قوجاقانوۆا ايتىپ بەردى، دەپ حابارلايدى Almaty-akshamy.kz.
12 مامىر - حالىقارالىق مەيىربيكە كۇنىنە وراي الماتى قالاسىندا ءبىرقاتار ءىس-شارالار، ونىڭ ىشىندە عىلىمي كونفەرەنسيالار، بايقاۋلار جانە ت.ب. ۇيىمداستىرىلۋدا.
«اتاۋلى كۇنگە وراي بىزدە كوپتەگەن ءىس-شارالار وتكىزىلۋدە. مىسالى، 20 مامىرعا «انا مەن بالا» كونفەرەنسياسى جوسپارلانعان. اۋداندىق دەڭگەيدە مەديسينالىق مەكەمەلەر اراسىندا بايقاۋلار وتكىزىلىپ، قالالىق كەزەڭنىڭ جەڭىمپازدارى ەرتەڭگى مەرەكەلىك كەشتە ماراپاتتالاتىن بولادى»، - دەدى ءوز كەزەگىندە گ. قوجاقانوۆا.
سپيكەر مەديسينا قىزمەتكەرلەرىن دايىنداۋدا ولاردىڭ ۇزدىكسىز كاسىبي ءبىلىم الۋىنا ۇلكەن كوڭىل بولىنەتىنىن اتاپ ءوتتى. وسى ماقساتتا الماتى قالاسى قوعامدىق دەنساۋلىق ساقتاۋ باسقارماسى مەيىربيكە قىزمەتكەرلەرىنىڭ بىلىكتىلىگىن ارتتىرۋعا قولداۋ كورسەتەدى.
«2022 جىلى قالانىڭ 10 باس مەيىربيكەسى تاجىريبە الماسۋ ماقساتىندا يزرايل مەملەكەتىنە باردى. وندا ءبىز اۋرۋحانادا قىزمەت كورسەتۋ داعدىلارىن يگەردىك. ءبىز العان تاجىريبەنى پيلوتتىق جوبا رەتىندە وسىندا ەنگىزۋدەمىز»، - دەپ قوستى ول.
ءوز كەزەگىندە ارداگەر مەيىربيكە ماييا ابابكوۆا، دەنساۋلىق ساقتاۋ سالاسىندا مەيىربيكە ءرولىنىڭ ايتارلىقتاي ارتىپ، جۇمىستىڭ 80% استامى وعان جۇكتەلەتىنىن ايتتى.
«مەنىڭشە، ءبىزدىڭ قازاقستاندىق، الماتىلىق دەنساۋلىق ساقتاۋ سالاسىنىڭ جەتىستىكتەرىنە مەدبيكەلەردىڭ قوسقان ۇلەسىن اسىرا باعالاۋ مۇمكىن ەمەس. وسىدان بىرنەشە جىل بۇرىن بۇل ماماندىقتىڭ نەگىزى نەدە دەپ مەنەن سۇراعان جاعدايدا، مەن مەيىرىمدىلىك دەر ەدىم. ءبىراق بۇگىنگى تاڭدا مەن ونىڭ نەگىزىندە ۇنەمى شىڭدالۋ ارقىلى عانا كەلەتىن كاسىبيلىك دەپ ايتار ەدىم»، - دەپ ءبولىستى ول.
سپيكەرلەر اقپاراتى بويىنشا، الماتى قالاسىندا 18 مىڭ مەيىربيكە بولسا، ولاردىڭ 4800-دەن استامى جوعارى ءبىلىمدى. قالادا سونىمەن قاتار مەيىربيكەلەر قاۋىمداستىعى دا بار.