الماتى قالاسىنداعى №118 مەكتەپ-گيمنازياسىندا 1 ماۋسىم – حالىقارالىق بالالاردى قورعاۋ كۇنىنە وراي ەرەكشە مەديسينالىق-پروفيلاكتيكالىق اكسيا ۇيىمداستىرىلدى. "دەنساۋلىعىڭدى تەكسەر" اتتى بۇل ءىس-شارا №11 قالالىق ەمحانامەن بىرلەسىپ وتكىزىلدى. شارا اياسىندا مەكتەپ وقۋشىلارى مەديسينالىق تەكسەرىستەن ءوتىپ، ارنايى سەرتيفيكات الدى.
بالالار دەنساۋلىعىنا نازار اۋدارۋعا باعىتتالعان شاراعا 120-عا جۋىق بالا قاتىستى. اكسيانىڭ ماقساتى مەن مازمۇنى جايلى №11 قالالىق ەمحانانىڭ پروفيلاكتيكا جانە پسيحوالەۋمەتتىك كومەك ءبولىمىنىڭ مەڭگەرۋشىسى ءالونا زەكۋنوۆا ايتىپ بەردى.
"بۇل شارا بالالاردىڭ دەنساۋلىعىن قورعاۋعا، اۋرۋلاردىڭ الدىن الۋعا باعىتتالعان. بۇگىنگى مەديسينالىق تەكسەرۋ – بالالار ءۇشىن اسا ماڭىزدى پروفيلاكتيكالىق شارا. مۇنداي تەكسەرۋلەر بالا دەنساۋلىعىن باقىلاۋدا ۇستاۋعا، اۋرۋلاردى ەرتە كەزەڭدە انىقتاۋعا، سونىمەن قاتار ونىڭ پسيحوفيزيكالىق دامۋىن باعالاۋعا كومەكتەسەدى. بالانىڭ العاشقى دارىگەرلىك باقىلاۋى ول ءالى نارەستە كەزىندە-اق باستالادى. ال ءبىر جاستان باستاپ 17 جاسقا دەيىن ولار جىل سايىن تولىق تەكسەرىستەن ءوتىپ تۇرۋى كەرەك. كەيبىر جاس كەزەڭدەرىندە تەرەڭدەتىلگەن ديسپانسەرلىك باقىلاۋ دا قاراستىرىلعان. بۇگىنگى تەكسەرۋ ناتيجەسىندە بالالار اراسىندا ءجيى كەزدەسەتىن ارتىق سالماق، كورۋ قابىلەتىنىڭ ناشارلاۋى، سكوليوز جانە كاريەس سياقتى ماسەلەلەر انىقتالدى. بۇل اۋرۋلار سىرت كوزگە بايقالماۋى مۇمكىن، سوندىقتان وسىنداي جوسپارلى پروفيلاكتيكالىق شارالار ولاردىڭ الدىن الۋعا كومەكتەسەدى"، — دەيدى ءالونا زەكۋنوۆا.
ارنايى ءىس-شارا بالالاردىڭ ءوز دەنساۋلىعىنا نازار اۋدارۋعا ىنتالاندىرادى دەيدى №118 مەكتەپ-گيمنازياسى ديرەكتورىنىڭ تاربيە ءىسى جونىندەگى ورىنباسارى ديلناز نۋردۋن.
"جىل سايىن 1 ماۋسىم – بالالاردى قورعاۋ كۇنىنە وراي وسىنداي اۋقىمدى شارا ۇيىمداستىرامىز. بيىلعى اكسيا دا وسى ءداستۇرلى شارا اياسىندا ءوتتى. №11 ەمحانانىڭ قولداۋىمەن جۇزەگە اسقان بۇگىنگى تەكسەرۋ بالالاردىڭ ءوز دەنساۋلىعىنا جاۋاپكەرشىلىكپەن قاراۋىنا تۇرتكى بولدى دەپ سەنەمىز. بالالار ءوز دەنساۋلىعى تۋرالى ناقتى اقپارات الدى. بۇل ءارى مەكتەپ، ءارى ەمحانا ءۇشىن ۇلكەن جەتىستىك دەپ ەسەپتەيمىز"، – دەيدى ديلناز نۋردۋن.
مەكتەپ جاسىنداعى بالالاردىڭ دەنساۋلىعى – قوعام بولاشاعىنىڭ نەگىزى. سەبەبى ءدال وسى كەزەڭدە بالانىڭ اعزاسى قارقىندى دامىپ، ءتۇرلى وزگەرىستەرگە ۇشىرايدى. ۋاقتىلى تەكسەرۋ مەن الدىن الۋ – ولاردىڭ دەنساۋلىعىن ۇزاق جىلدارعا ساقتاۋدىڭ ەڭ ءتيىمدى جولى. «دەنساۋلىعىڭدى تەكسەر» اكسياسى بالالاردىڭ دەنساۋلىعىنا سەرگەك قاراۋعا، سالاۋاتتى ءومىر سالتىن ۇستانۋعا، ءارى اتا-انالار مەن ۇستازداردىڭ دەنساۋلىق تاربيەسىنە جاۋاپكەرشىلىكپەن قاراۋىنا زور ۇلەس قوستى.