الماتى قالاسىندا وتكەن VII حالىقارالىق «ورتەكە» قۋىرشاق تەاترلارى فەستيۆالىنىڭ سالتاناتتى جابىلۋ راسىمىندە قازاقستانمەن قاتار گرۋزيا، تۇركيا، وزبەكستان جانە ازەربايجاننان كەلگەن كاسىبي قۋىرشاق تەاترلارى ونەر كورسەتتى، دەپ حابارلايدى aqshamnews.kz
بەس كۇن بويى قاتىسۋشىلار ۇزدىك قويىلىمداردى كورەرمەن نازارىنا ۇسىندى. فەستيۆال اياسىندا اتالعان ەلدەردىڭ رەجيسسەرلەرى، اكتەرلەرى، تەاترتانۋشىلارى مەن ساراپشىلارىنىڭ قاتىسۋىمەن دوڭگەلەك ۇستەل ءوتتى. وندا قۋىرشاق تەاترىنىڭ دامۋى بويىنشا وزەكتى ماسەلەلەر، تەاتر سىنى، ءداستۇر مەن زاماناۋي كوركەمدىك تاسىلدەردىڭ ءوزارا بايلانىسى تالقىلاندى.
فەستيۆالدىڭ قازىلار القاسى قۇرامىنا قازاقستان، مولدوۆا، تاجىكستان جانە تۇركيادان كەلگەن ساراپشىلار كىردى.
فەستيۆال جەڭىمپازدارى ءتۇرلى نوميناسيالار بويىنشا انىقتالدى. اتاپ ايتساق، «ەڭ ۇزدىك سپەكتاكل» نوميناسياسى بويىنشا الماتى قالاسىنىڭ مەملەكەتتىك قۋىرشاق تەاترى (قازاقستان) ن. گوگولدىڭ شىعارماسى بويىنشا قويىلعان «شەكپەن» سپەكتاكلى، «ەڭ ۇزدىك رەجيسسەرلىك جۇمىس» نوميناسياسى بويىنشا ديميتريي حۆتيسياشۆيلي مەن گيا مارگانياني، نودار دۋمبادزە اتىنداعى مەملەكەتتىك كاسىبي جاستار تەاترى (گرۋزيا) «وتەللو» سپەكتاكلى، «ەڭ ۇزدىك اكتەرلىك جۇمىس» نوميناسياسى بريىنشا ەرجان بيعاشيەۆ، ماڭعىستاۋ وبلىستىق قۋىرشاق تەاترىنىڭ اكتەرى (قازاقستان) – يۋ. پوسپەلوۆانىڭ پەساسى بويىنشا قويىلعان «دوس ىزدەيمىن» سپەكتاكلى، «ەڭ ۇزدىك سۋرەتشى جۇمىسى» نوميناسياسىمەن باتۋمي مەملەكەتتىك كاسىبي قۋىرشاق جانە جاستار تەاترى (گرۋزيا) «وتباسى» سپەكتاكلى، (سەنوگرافياسى ي. كيكۆادزە مەن ن. ساباشۆيليدىكى) «ەڭ ۇزدىك اكتەرلىك انسامبل» اتالىمى بويىنشا قوستاناي وبلىستىق قۋىرشاق تەاترى (قازاقستان) نيكولوز ءساباشۆيليدىڭ پەساسى بويىنشا قويىلعان «MEN…» سپەكتاكلى ماراپاتتالدى.
«ورتەكە» فەستيۆالى تاعى ءبىر مارتە تەاتر ونەرىنىڭ دامۋىنا جانە مادەنيەتتەر اراسىنداعى بايلانىستى نىعايتۋعا ىقپال ەتەتىن حالىقارالىق مادەني الاڭعا اينالدى.