ءتۇسىرىلىم توبى دەنيستىڭ باستاپقى سەنارييىن وزگەرىسسىز قالدىرۋعا تىرىسقان
تانىمال مانەرلەپ سىرعاناۋشى بولعان دەنيس تەننىڭ سەنارييىمەن تۇسىرىلگەن «سوقىر ماحاببات» ءفيلمى كينوتەاترلاردا كورسەتىلە باستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قايعىلى وقيعادان ءبىر اي بۇرىن، 2018 جىلدىڭ ماۋسىمىندا دەنيس تەن فيلم سەنارييىن Screenlife Contest بايقاۋىنا جولداعان جانە فيناليستەر قاتارىنان كورىنگەن.
ءتۇسىرىلىم جۇمىستارى سپورتشى ولىمىنەن كەيىن 2019 جىلى باستالعان. وعان ۆەنەسيا كينوفەستيۆالىنىڭ جەڭىمپازى چاك چە رەجيسسەرلىك ەتسە، تانىمال رەجيسسەر تيمۋر بەكمامبەتوۆ پەن دەنيستىڭ اناسى وكسانا تەن باس پروديۋسەر بولدى. ەلورداداعى تۇساۋكەسەرگە دەنيس تەننىڭ اناسى، دوستارى، تانىمال اكتەرلەر جانە ق ر مادەنيەت جانە سپورت مينيسترلىگىنىڭ وكىلدەرى كەلدى.
سونىمەن بىرگە، نۇر-سۇلتانداعى زاعيپتار قاۋىمداستىعى ءۇشىن ارنايى كينوزال ازىرلەندى، وندا ءفيلمنىڭ اۋديوديسكريپسياسى قاتار جۇرگىزىلدى. ويتكەنى، فيلم جەلىسى زاعيپ جىگىت پەن كەرەڭ جانە مىلقاۋ بويجەتكەن اراسىندا ءوربيدى. جاڭا تەحنولوگيالار مۇمكىندىگى شەكتەۋلى جانداردىڭ ءبىر-بىرىن تۇسىنىسۋىنە كومەكتەسەدى. ءفيلمنىڭ جالپى ۇزاقتىعى – 33 مينۋت، ءتۇسىرىلىم توبى دەنيستىڭ باستاپقى سەنارييىن بارىنشا وزگەرىسسىز قالدىرۋعا تىرىسقان.
بۇل تۋىندىنىڭ قالاي تۇسىرىلگەنى تۋرالى قانات بەيسەكەيەۆتىڭ «فيلم تۋرالى ءفيلمى» قوسا كورسەتىلەدى. دەرەكتى فيلمدە دەنيستىڭ اعىلشىن تىلىندە جازعان ولەڭ شۋماقتارى، اندەرى كينوكارتينادا كورسەتىلەتىنى ايتىلعان.
«ءبىز سۇحبات قۇرۋ ءۇشىن سيفرلىق حابارلامالار، ەمودزيلەر جانە باسقالارىن پايدالاناتىن الەمدە ءومىر ءسۇرىپ جاتىرمىز. بۇل يدەيا وزىمە دە قىزىق بولدى. مەن قاتتى قوبالجىپ ءجۇرمىن، ويتكەنى بۇل جاي عانا قىسقامەتراجدى فيلم ەمەس. بۇل دەنيستەن قالعان امانات، ءبىز جاقسى كورەتىن جانە قۇرمەتتەيتىن ادامنىڭ باستاماسى. بۇل باستامانى بۇزعىمىز كەلمەيدى نەمەسە بوستان-بوس وتكىزىپ العىمىز كەلمەيدى. مۇندا مەن ءمىنسىز فيلم جاساعىم كەلەدى، ونىڭ ءوزى، اينالاسىنداعى جاقىندارى كۇتكەننەن دە جاقسى تۋىندى ۇسىنعىم كەلدى. فيلمدە دەنيستىڭ جانكۇيەرلەرىنە ۇنايتىن كەرەمەت ساتتەر بار، كوپتەگەن توسىنسىيلار جاسىرىلعان. ءتىپتى دەنيس تۋرالى ەستىمەگەن شەتەلدىكتەر دە وسى فيلم ارقىلى ايتقىمىز كەلگەن قۇندىلىقتاردى تۇسىنەر ەدى»، - دەدى فيلم رەجيسسەرى چاك چە.
سونىمەن بىرگە، سپورتشىنىڭ جاقىن دوسى يگور ساي ءفيلمنىڭ اتقارۋشى پروديۋسەرى بولدى.
«ءبىز لوس-اندجەلەستە كەزدەستىك، مەن جاڭا كينو جوباسىمەن جۇمىس ىستەپ ءجۇردىم، ال دەنيس جاتتىعۋعا كەلەتىن. سوندا دەنيسكە سەناريي جازىپ، Screenlife Contest بايقاۋىنا قاتىسۋدى ۇسىنعان ەدىم. مۇنى ۇمىتىپ تا كەتىپپىن، ءۇش ايدان كەيىن دەنيستىڭ سەنارييى فينالعا وتكەنىن جانە ماسكەۋدە ءوز يدەياسىن قورعايتىنىن ەستىدىم. مەن ونىڭ اڭگىمە، ءان جازاتىنىن بىلەتىنمىن، سەناريي دە جازا الاتىنىنا سەنىمدى بولدىم. ويتكەنى، ول مۇز ايدىنىندا ءوز تانىمەن، بيىمەن حيكايا باياندايتىن ستوريتەللەر ەدى»، - دەدى ي. ساي.