دەمالىس كۇندەرى قازاقستاننىڭ كەي وڭىرلەرىندە قار ارالاس جاڭبىر جاۋادى

بارەنس تەڭىزىنىڭ ۇستىندە ورنالاسقان سيكلون وزىمەن بىرگە جاڭبىر اكەلەدى.

«قازگيدرومەت» سينوپتيكتەرى دەمالىس كۇندەرى اۋا رايى قانداي بولاتىنىن بولجادى، دەپ حابارلايدى Almaty-akshamy.kz.

الداعى دەمالىس كۇندەرى قازاقستان اۋماعى بويىنشا باتىستان شىعىسقا قاراي جىلجىعان، ورتالىعى بارەنس تەڭىزىنىڭ ۇستىندە ورنالاسقان سيكلون وزىمەن بىرگە جاڭبىر اكەلەدى.

«ەلدىڭ سولتۇستىك، شىعىس جانە تاۋلى ايماقتارىندا تۇندە جانە تاڭەرتەڭ قار ارالاس جاڭبىر جاۋۋى مۇمكىن. تۇمان ءتۇسىپ، جەل كۇشەيەدى. وڭتۇستىك پەن باتىستا شاڭدى داۋىل تۇرادى. سيكلون ارتىنان ەۋروپا ايماقتارىنان سۋىق انتيسيكلون جىلجىپ كەلەدى. ول جاڭا اپتانىڭ باسىندا رەسپۋبليكانىڭ باتىسىندا، سودان كەيىن سولتۇستىگىندە جاۋىن-شاشىن توقتايدى. دەمالىس كۇندەرى ەلىمىزدىڭ سولتۇستىگىندە، شىعىسىندا جانە ورتالىعىندا تۇندە اۋا تەمپەراتۋراسى -3 گرادۋستان +5 گرادۋسقا دەيىن، كۇندىز +3-13 گرادۋسقا دەيىنگى ارالىقتى كورسەتەدى»،- دەلىنگەن سينوپتيكتەردىڭ حابارلاماسىندا.

رەسپۋبليكانىڭ باتىسىندا تۇندە 1-9 گرادۋسقا دەيىن، ال كۇندىز اۋا 15-25 گرادۋسقا دەيىن جىلىنادى.

وڭتۇستىكتە تۇندە 1-6 گرادۋسقا دەيىن جىلى، تاۋلى ايماقتاردا 2-7 گرادۋسقا دەيىن اياز بولادى، ال كۇندىز كۇن 12-20 گرادۋسقا دەيىن جىلى بولادى.