قازاقستاندا «دەبيۋت» شىعارماشىلىق-وندىرىستىك بىرلەستىگى قايتا قۇرىلماق. مۇنداي باستامانى ۇلتتىق كينونى قولداۋ مەملەكەتتىك ورتالىعى كوتەرىپ وتىر، دەپ حابارلايدى Almaty-akshamy.kz Inform.kz-كە سىلتەمە جاساپ.
«قازىرگى ۋاقىتتا كينو ورتالىعى تانىمال كينەماتوگرافيستەرمەن بىرلەسىپ، ۇزاق جىلدار بويى «قازاقفيلم» كينوستۋدياسىنىڭ قۇرىلىمىندا بولعان «دەبيۋت» شىعارماشىلىق-وندىرىستىك بىرلەستىگىن قايتا قۇرۋ باستاماسىن كوتەردى. بۇل ماسەلە بۇگىندە بارىنشا وزەكتى دەپ سانايمىز»، - دەپ اتاپ وتكەن ەدى ۇيىمنىڭ باسپا ءسوز قىزمەتى اگەنتتىكتىڭ رەسمي ساۋالىنا بەرگەن جاۋابىندا.
ال «ۇلتتىق كينونى قولداۋ مەملەكەتتىك ورتالىعى» كەاق باسقارما ءتوراعاسى ەسەتجان قوسىبايەۆتىڭ ايتۋىنشا، بۇل ءۇشىن اتالعان بىرلەستىكتىڭ قۇرىلىمىنا، قارجىلاندىرىلۋىنا جانە قىزمەتىنە قاتىستى ماسەلەلەردى شەشۋ قاجەت.
«ءبىز بۇل يدەيانىڭ نەگىزگى باستاماشىسى رەتىندە ءقازىردىڭ وزىندە مادەنيەت جانە سپورت ءمينيسترى داۋرەن ابايەۆپەن اڭگىمەلەستىك جانە دە مينيسترلىكتەن بولاشاق بىرلەستىكتىڭ زاڭدى مارتەبەسىن كەلىسۋدى سۇرايتىن بولامىز»، - دەدى ەسەتجان قوسىبايەۆ.
ەستەرىڭىزگە سالا كەتەيىك، «دەبيۋت» شىعارماشىلىق-وندىرىستىك بىرلەستىگى وتىز جىلعا جۋىق ۋاقىت بويى «قازاقفيلم» كينوستۋدياسىنىڭ قۇرامىندا جۇمىس ىستەدى. بىرلەستىكتىڭ باستى مىندەتى كينو سالاسىنا سۇبەلى ۇلەس قوسا الاتىن جاس تالانتتاردى انىقتاۋ بولاتىن.