الماتى تەحنولوگيا جانە فلوريستيكا كوللەدجىنىڭ ينكليۋزيۆتى ءبىلىم بەرۋ رەسۋرستىق ورتالىعى ەرەكشە شارا ۇيىمداستىردى. حالىقارالىق ساڭىراۋلار كۇنىنە ارنالعان III رەسپۋبليكالىق ينكليۋزيۆتى «DEAF MADE» فەستيۆالى ءوتتى. شارانىڭ شىرايى دا، شىنايىلىعى دا بولەك - تىنىشتىققا ۇيرەنگەن جۇرەكتەردىڭ ءوز ونەرىن وزگەشە ادىسپەن جەتكىزۋى كورەرمەندى قايران قالدىرماي قويمادى.
2025 جىلدىڭ قازاقستاندا جۇمىسشى ماماندىقتار جىلى دەپ جاريالانۋى بۇل فەستيۆالدىڭ ءمانىن ودان سايىن ارتتىردى. سەبەبى شارا تەك شىعارماشىلىق ەمەس، تەحنيكالىق جانە جۇمىسشى ماماندىقتاردى مەڭگەرىپ جۇرگەن ەستۋ قابىلەتى بۇزىلعان جاستاردىڭ الەۋەتىن تانىتاتىن الاڭعا اينالدى. مۇندا ولاردىڭ ونەرى عانا ەمەس، ەڭبەككە دەگەن ىنتاسى، ماماندىققا دەگەن تالپىنىسى دا ايقىن كورىندى. فەستيۆالگە ەلىمىزدىڭ ءتۇرلى وڭىرىندەگى تەحنيكالىق جانە كاسىپتىك ءبىلىم بەرۋ ۇيىمدارىنان كەلگەن ستۋدەنتتەر جينالدى. ءۇش جىل قاتارىنان وتكىزىلىپ كەلە جاتقان بۇل مادەني شارا ءبىر جاعىنان - ونەر دوداسى، ەكىنشى جاعىنان - ينكليۋزيانىڭ ناقتى كورىنىسى. كەدەرگىسىز ورتا، تەڭ مۇمكىندىك، شىعارماشىلىق ەركىندىك — فەستيۆالدىڭ باستى قاعيداتتارى.
فەستيۆالدىڭ العاشقى ءبولىمى -«ءبىزدىڭ برەند» ءوزىن-وزى تانىستىرۋى.ەكىنشى ءبولىم حالىق ءبيى.
ءۇشىنشى ءبولىم ىم-يشارامەن ءان ايتۋ كەزەڭى بولدى.بۇل - فەستيۆالدىڭ ەڭ اسەرلى ساتتەرىنىڭ ءبىرى بولدى. ءار قيمىل، ءار يشارا — ءسوزدىڭ ورنىنا جۇرەتىن ەموسيا. فەستيۆالدىڭ سوڭعى ءبولىمى — «زاماناۋي ەتنو-ستيل» مودا تەاترى.
نۇرىمبەتوۆ اناربەك قالدار ۇلى، الماتى تەحنولوگيا جانە فلوريستيكا كوللەدجىنىڭ ديرەكتورى:
– بۇگىن ءبىز ەستۋ مۇمكىندىگى شەكتەۋلى جانداردىڭ بويىنداعى ەرەكشە تالانتتى، شەكسىز شىعارماشىلىقتى جانە جىگەرلى مىنەزدى كوپشىلىككە كەڭىنەن كورسەتۋ ءۇشىن باس قوسىپ وتىرمىز. ينكليۋزيۆتى ورتا قالىپتاستىرۋ – قوعامنىڭ دامۋىنىڭ باستى كورسەتكىشتەرىنىڭ ءبىرى. سول سەبەپتى مۇنداي شارالار ءار ادامنىڭ قابىلەتى مەن مۇمكىندىگىنە جول اشىپ، ءوز ورنىن تابۋىنا مۇمكىندىك بەرەدى. ءاربىر ونەر كورسەتۋ، ءاربىر ۇسىنىلعان يدەيا – قاراپايىم ساحنالىق ءنومىر ەمەس. بۇل – ادامنىڭ ىشكى مۇمكىندىگىنىڭ مولدىعىن، ونىڭ قولىنان كەلمەيتىن ءىس جوق ەكەنىن دالەلدەيتىن شاعىن جەڭىس. ءبىزدىڭ كوللەدج ءۇشىن بۇل فەستيۆال ەرەكشە ماڭىزعا يە. سەبەبى مۇندا تەك تالانت ەمەس، ەڭ الدىمەن قايسارلىق، توزىمدىلىك، ءوز-وزىن دامىتۋعا دەگەن تالپىنىس كورىنەدى. وسىنداي ءىس-شارالار ارقىلى قوعامعا ينكليۋزيۆتىك مادەنيەتتىڭ قانداي ماڭىزدى ەكەنىن تاعى ءبىر رەت كورسەتۋ مۇمكىندىگى تۋادى.