الماتىدا جاستاردىڭ ادالدىق مادەنيەتىن قالىپتاستىرۋعا باعىتتالعان ماڭىزدى شارا ءوتتى. «ادال ۇرپاق» جوباسى اياسىنداعى «ءبىز سىبايلاس جەمقورلىققا قارسىمىز» بايقاۋىنىڭ جەڭىمپازدارى ماراپاتتالىپ، جاس قاتىسۋشىلار وزدەرىنىڭ ازاماتتىق ۇستانىمىن شىعارماشىلىق جۇمىس ارقىلى تانىتتى. قوعامدا ادالدىق پەن جاۋاپكەرشىلىك قۇندىلىقتارىن نىعايتۋدى ماقسات ەتكەن بۇل جوبا بيىل دا جاستاردىڭ قىزىعۋشىلىعىن ارتتىرا ءتۇستى.
«ادال ۇرپاق» الەۋمەتتىك جوباسىن «اقپاراتتىق-رەسۋرستىق ورتالىق» قوعامدىق قورى الماتى قالاسى جاستار ساياساتى باسقارماسىنىڭ قولداۋىمەن جۇزەگە اسىرىپ كەلەدى. جوبا جاستاردى تەك ادالدىققا تاربيەلەۋمەن قاتار، سىبايلاس جەمقورلىققا قارسى مادەنيەتتى قالىپتاستىرۋدى كوزدەيدى.
بيىلعى بايقاۋدا قاتىسۋشىلار ەسسە جانە بەينەروليك فورماتىندا جەمقورلىقتىڭ قوعامعا زيانى، ادالدىقتىڭ ماڭىزى تۋرالى ءوز كوزقاراسىن ۇسىندى. جەڭىمپازدار مەن بەلسەندىلەر سالتاناتتى راسىمدە ماراپاتتالدى.
«ادال ۇرپاق» جوباسى – پرەزيدەنتتىڭ زاڭ مەن ءتارتىپ يدەولوگياسىن قولداۋعا باعىتتالعان ماڭىزدى باستاما. ادال ازامات – الدىمەن ءوز ىسىنە جاۋاپتى، ءسوزى مەن ءىسى سايكەس كەلەتىن ادام. بۇگىن ماراپاتتالعان جاستار وسى باعىتتاعى ءوز كوزقاراسىن ناقتى جەتكىزە ءبىلدى»، – دەدى الماتى قالاسى جاستار ساياساتى باسقارماسىنىڭ باسشىسى كاجدەنبەك ازيز.
ۇيىمداستىرۋشىلاردىڭ ايتۋىنشا، جوبا اياسىنداعى ءىس-شارالار جاستار اراسىندا ادالدىق، ادىلدىك جانە ازاماتتىق جاۋاپكەرشىلىك قۇندىلىقتارىن نىعايتىپ، قوعامنىڭ دامۋىنا ۇلەس قوساتىن جاڭا بۋىندى قالىپتاستىرۋعا سەرپىن بەرەدى.