ددۇ پاندەميانىڭ ءالى اياقتالماعانىن مالىمدەدى

تابىسى تومەن ەلدەردىڭ 1 ميللياردقا جۋىق تۇرعىنى ءالى ۆاكسيناسيالانباعان.

دۇنيەجۇزىلىك دەنساۋلىق ساقتاۋ اسسامبلەياسىندا ءسوز سويلەگەن دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) باس ديرەكتورى تەدروس ادحانوم گەبرەيۋس COVID-19 ۆيرۋسىنىڭ قاۋىپتىلىگى تۋرالى ەسكە سالدى، دەپ حابارلايدى Almaty-akshamy.kz

ونىڭ ايتۋىنشا، كوروناۆيرۋستىق ينفەكسيانىڭ پاندەمياسى تىركەلگەن جاعدايلاردىڭ ازايۋىنا قاراماستان ءالى اياقتالماعان.

«ءبىز قىراعىلىقتى ءوز تاۋەكەلىمىزبەن تومەندەتەمىز. تەستىلەۋدەن جانە سەكۆەنيرلەۋدەن باس تارتۋ ۆيرۋستىڭ ەۆوليۋسياسىن بايقامايتىنىمىزدى بىلدىرەدى»، -دەدى ددۇ باسشىسى.

ول تابىسى تومەن ەلدەردىڭ 1 ميللياردقا جۋىق تۇرعىنى كوۆيدكە قارسى ءالى كۇنگە دەيىن ۆاكسيناسيالانباعانىن اتاپ ءوتتى.

«تىركەلگەن جاعدايلار تەستىلەۋ كورسەتكىشتەرى تومەندەگەن بارلىق ايماقتارداعى 70-كە جۋىق ەلدە ارتىپ كەلەدى»، - دەدى ول.

ەستەرىڭىزگە سالا كەتەيىك، قازىرگى ۋاقىتتا الەمدە مايمىلدار شەشەگىن جۇقتىرۋ جاعدايلارىنىڭ سانى ارتىپ كەلەدى. مايمىل شەشەگى تىركەلگەن ەلدەردىڭ سانى 15-كە جەتتى. ءولىم جاعدايلارى تىركەلگەن جوق.