ددسۇ تىرىسقاق ىندەتىنە قاتىستى ەسكەرتۋ جاسادى

2023 جىلدان بەرى بۇل ماسەلە ۋشىعا تۇسكەن.

دۇنيەجۇزىلىك دەنساۋلىق ساقتاۋ ۇيىمىنىڭ ساراپشىسى الەمدە تىرىسقاق اۋرۋىنىڭ كوبەيۋىنە بايلانىستى بۇعان نازار اۋدارۋعا شاقىرىپ وتىر، دەپ حابارلايدى Almaty-akshamy.kz

5 900 ادام قايتىس بولعان!

دۇنيەجۇزىلىك دەنساۋلىق ساقتاۋ ۇيىمىنىڭ تىرىسقاق جانە ەپيدەميالىق ديارەيالىق اۋرۋلار توبىنىڭ جەتەكشىسى فيليپپ باربوزا «الەم بويىنشا تىرىسقاق ىندەتىنىڭ كۇشەيۋىنە» نازار اۋداردى. ول كليماتتىڭ وزگەرۋى سالدارى مەن دەر كەزىندە ەمدەلۋگە قارجى جەتىسپەۋىنەن جاعداي قيىنداپ وتىرعانىن اتاپ ءوتتى. بىلتىر قاڭتاردا ددسۇ بۇل اۋرۋدىڭ ءورشۋىن ءۇشىنشى دەڭگەيدەگى توتەنشە جاعداي، ياعني ەڭ جوعارى دەڭگەي دەپ باعالاعان ەدى.

باربوزانىڭ ايتۋىنشا، سودان بەرى جاعداي تەك ناشارلاپ جاتىر. كەيىنگى مالىمەتتەرگە سايكەس، 2023 جىلدىڭ باسىنان 2024 جىلدىڭ 31 ناۋرىزىنا دەيىن 31 ەلدە تىرىسقاق اۋرۋىن جۇقتىرعان 824 479 ادام تىركەلىپ، 5 900 ادام قايتىس بولعان.

وزدىگىنەن ەمدەلۋگە بولمايدى!

ەسكە سالساق، دەنساۋلىق ساقتاۋ مينيسترلىگىنىڭ باسپا ءسوز قىزمەتى ازاماتتارعا تىرىسقاق اۋرۋىنا بايلانىستى ەسكەرتۋ جاساعان بولاتىن. دسم قازاقستاندىق تۋريستەرگە تىرىسقاق اۋرۋى بويىنشا قولايسىز ەلدەرگە (افريكا، ازيا، ونىڭ ىشىندە ءۇندىستان، اۋعانستان، پاكىستان ەلدەرى) بارۋ كەزىندە مىناداي كەڭەس بەرگەن:

قايناتىلعان نەمەسە بوتەلكەدەگى سۋدى ءىشۋ؛

ءار ءتۇرلى سۋسىنداردى سالقىنداتۋ ءۇشىن مۇزدى پايدالانباۋ؛

⁠ونىمدەردى تۇتىنۋ الدىندا ءتيىستى تەرميالىق وڭدەۋ؛

جەمىستەر مەن كوكونىستەردى قايناتىلعان نەمەسە بوتەلكەدەگى سۋمەن مۇقيات جۋۋ؛

تاماق ىشەر الدىندا جانە دارەتحاناعا بارعاننان كەيىن قولدى سابىنمەن مۇقيات جۋۋ؛

تەك رۇقسات ەتىلگەن سۋ ايدىندارىندا شومىلۋ جانە ونىڭ سۋىن جۇتپاۋ؛

اۋرۋدىڭ العاشقى بەلگىلەرى پايدا بولعان كەزدە وزدىگىنەن ەمدەلۋگە بولمايدى، دەرەۋ مەديسينالىق كومەككە جۇگىنۋ كەرەك.