بۇگىن – ديكتور، قازاقستاننىڭ حالىق ءارتىسى انۋاربەك بايجانبايەۆتىڭ تۋعان كۇنى.
وسىعان وراي داۋىرپاز داۋىس يەسىنىڭ وي-تولعامدارىن ۇسىنۋدى ءجون كوردىك.
ديكتور — ماتىنمەن دۇرىس جۇمىس ىستەي الاتىن جۋرناليست.
ديكتور كەڭ تىنىستى ادام بولۋى كەرەك. ول ىشكە تەرەڭ ءبىر رەت دەم الىپ، سول اۋانى ون ءتورت رەت ساناعانشا از-ازداپ شىعارۋعا، سونى وسى تىلسىم شاققا ۇنەمدەپ جەتكىزۋگە ۇيرەنگەنى دۇرىس.
ديكتور بولام دەگەن جاس تالاپكەر ءۇش زاۋالدان: تاماققا سۋىق تيگىزىپ الۋدان، تەمەكى تارتۋدان جانە شەكىلدەۋىك شاعۋدان اۋلاق بولعانى ءجون. ويتكەنى مۇنىڭ ۇشەۋى دە — تابيعاتتىڭ وزىنە بەرگەن تاماشا كومەي داۋىسىن بارىلداتىپ بۇلدىرەتىن زىميان، سازدى ءۇن مەن مۋزىكالى اۋەزدىڭ قاس جاۋى...
جاسىل ءتۇستى ۇناتامىن. جاسىل تۇسكە جاستايىمنان قۇمارمىن. شىركىن، جاسىل جايلاۋعا نە جەتسىن! ونىڭ سەبەبى كوزىمنىڭ ءسال-سال اقاۋى بولعاندىقتان شىعار. تەگى جاسىل تۇسكە نۇر بىتكەن جاقسى قانادى. جاسىل بوياۋ — ەجەلدەن، سوناۋ باعزى زاماننان جولى بولعان بوياۋ. ماسەلەن، پويىز بەن ماشينانىڭ جولى بولۋى ءۇشىن قاشاننان جارقىراپ جاسىل جارىق جانادى ەمەس پە؟!