اقتاۋدا ارالاس جەكپە-جەكتەن ۇيىمداستىرىلعان Eagle FC 48 & Naiza FC 41 تۋرنيرىندە كەشتىڭ باستى ايقاسى ءوتىپ، وندا قازاقستاندىق فايتەر داۋرەن ەرمەكوۆ (16-5) پەن رەسەيلىك گامزات حيراماگومەدوۆ (10-1) كەزدەستى. Almaty-akshamy.kz بۇل تۋرالى Inform.kz-كە سىلتەمە جاساپ حابارلايدى.
تيتۋلدىق جەكپە-جەك EFCء-دىڭ ورتا سالماقتاعى «ۋاقىتشا» چەمپيونى بەلدىگى ءۇشىن ءوتتى. بەس راۋندقا ەسەپتەلگەن كەزدەسۋ سوڭىنا دەيىن جالعاسقان جوق – ەكىنشى راۋندتا د.ەرمەكوۆ قارسىلاسىن تەحنيكالىق نوكاۋتقا جىبەردى. وسىلايشا، قازاقستان سپورتشىسى كاسىبي مانسابىندا 17ء-ىنشى جەڭىسىنە قول جەتكىزىپ، Eagle FCء-دىڭ «ۋاقىتشا» چەمپيونى اتاعىن جەڭىپ الدى. ال گامزات حيراماگومەدوۆ ەكىنشى رەت جەڭىلىپ وتىر. جەكپە-جەك الدىندا رەسەيلىك شەبەر قازاقستاندىقتى جەڭەتىنىن ايتقان بولاتىن.
سونداي-اق كەش بارىسىندا رينگتە قازاقستاندىق يگور سۆيريد (20-10) پەن رەسەيلىك ارتۋر گۋسەينوۆ (27-11-1) ءوزارا مىقتىنى انىقتادى. ورتا سالماقتاعى جەكپە-جەك ءۇش راۋندقا ەسەپتەلدى. الايدا، ءبىرىنشى راۋندتا ي.سۆيريد تەحنيكالىق نوكاۋتقا ءتۇسىپ قالدى.
وسىلايشا، ارتۋر گۋسەينوۆ مما-دا 28ء-ىنشى رەت جەڭىسكە جەتتى. ال يگور سۆيريد 11ء-ىنشى رەت جىعىلىپ وتىر. ونەر كورسەتكەن تاعى ءبىر قازاقستاندىق قارسىلاسىن جەڭە المادى. مۋراد ابدۋراحمانوۆ (8-1) رەسەيلىك رۋسلان شاميلوۆپەن (10-3) كەزدەستى. بەس راۋندقا سوزىلۋى ءتيىس بولعان كەزدەسۋ ءبىرىنشى راۋندتا اياقتالدى. ر.شاميلوۆ وپپونەنتىنە بۋىندىرۋ ءادىسىن پايدالاندى.
وسىلايشا، رەسەيلىك جەكپە-جەك شەبەرى 11ء-ىنشى جەڭىسىنە جەتىپ، Naiza FC چەمپيونى اتاندى. ال مۋراد ابدۋراحمانوۆ كاسىپقوي مما-دا ەكىنشى رەت جەڭىلىستىڭ اششى ءدامىن تاتتى. ول 2017 جىلدان بەرى جەتى جەكپە-جەك وتكىزىپ، بارلىعىن ءساتتى اياقتاپ كەلە جاتقان ەدى.
سونداي-اق بۇعان دەيىن حابارلاعانىمىزداي، قازاقستاندىق بولات زامانبەكوۆ (3-1) قىرعىزستاندىق سىيمىك ەلديارۋۋلىنى (1-0) ەكىنشى راۋندتا بۋىندىرۋ ادىسىمەن جەڭدى. جەكپە-جەك كەشىندە العاشقى ايقاس قازاقستاندىق فايتەر مەيىربەك تولەگەنوۆ (3-1) پەن ازەربايجاندىق دجەيحۋن گودجالي (0-1) اراسىندا ءوتتى.
جەڭىل سالماقتاعى كەزدەسۋ ءۇش راۋندقا ەسەپتەلدى. تولەگەنوۆ قارسىلاسىن ءبىرىنشى راۋندتا اۋىرتۋ ادىسىمەن جەڭدى. ال سپورتشىبىز رۋسلان سارييەۆ (13-1) برازيليا وكىلى كايك الەنكاردى (10-3) ءبىرىنشى راۋندتا تەحنيكالىق نوكاۋتپەن جەڭدى.
رينگتە جەكپە-جەك وتكىزگەن وزگە قازاقستاندىقتار:
رومان دجومارت (2-1) — دجوزەف حەنلە (12-4-1، اقش) — حەنلە ەكىنشى راۋندتا بۋىندىرۋ ادىسىمەن جەڭىسكە جەتتى.
اسلان وتەعالييەۆ (9-7) — ماگومەد ال-ابدۋللا (9-1-1، رەسەي) — جەڭىس تورەشىلەردىڭ ءبىراۋىزدى شەشىمىمەن ال-ابدۋللاعا بەرىلدى.
زاحار ريابوۆ (2-3) — كونستانتين اندرەيسيەۆ (17-14، رەسەي) —اندرەيسيەۆ تورەشىلەردىڭ ءبىراۋىزدى شەشىمىمەن جەڭىسكە جەتتى.