29 ماۋسىم كۇنى الماتىدا جاڭارتىلعان «كۇنشۋاق» ورتالىعى تىڭ سەرپىنمەن ەسىگىن ايقارا اشتى. ورتالىق جۇمىسى «سامۇرىق-قازىنا» اق كومپانيالار توبى اتىنان ءبىرىڭعاي قايىرىمدىلىق وپەراتورى – «Samruk Kazyna Trust» قورىنىڭ قارجىلىق قولداۋىمەن جانداندى، -دەپ حابارلايدى Almaty-akshamy.kz.
جوبا اياسىندا بالالاردىڭ وي-ساناسىن دامىتاتىن، وڭالتىپ، دەنە شىنىقتىراتىن، كۇندەلىكتى قىزمەتكە قاجەت قۇرال-جابدىقتار الىندى. سونداي-اق قور كومەگىمەن تاجىريبە الماسۋ ماقساتىندا شەتەلدىك ماماندار تارتىلىپ، استانا، الماتى قالالارىمەن اتىراۋ، پاۆلودار، قوستاناي وبلىستارىنداعى داۋن سيندرومى بار بالالاردىڭ اتان-انالارىنا كەڭەس بەرۋ شارالارى جۇرگىزىلدى. جوبانىڭ بيۋدجەتى 100 ملن تەڭگەنى قۇرايدى.
ورتالىقتىڭ اشىلۋ سالتاناتىنا قاتىسقان «سامۇرىق-قازىنا» اق قوعاممەن بايلانىس، الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ ءتيىستى نىساننىڭ قوعامعا بەرەر پايداسى مەن ماڭىزدىلىعىن اتاپ ءوتتى.
«بىرلەسكەن ءىس-قيمىلدىڭ ناتيجەسىندە ورتالىق زامان تالابىنا ساي جابدىقتالىپ وتىر. جالپى ءبىزدىڭ قور بالالارعا بايلانىستى باستامالاردى ءاردايىم قولداپ كەلەدى. ماسەلەن، وتكەن جىلدان بەرى 73 مىڭنان استام بالاعا ءتۇرلى باعىتتاعى كومەك كورسەتىلدى. سوندىقتان ەرەكشە بالالارىمىزعا جانە ولاردىڭ اتا-انالارىنا بۇگىنگى جاڭالىق وتە جاقسى سىيلىق بولدى دەپ ويلايمىن. ەندى وسى جەردە جوعارى دەڭگەيدەگى وڭالتۋدان ءوتىپ، العا قاراي نىق قادام جاساۋ قاجەت»، - دەدى «سامۇرىق-قازىنا» اق باسقارۋشى ديرەكتورى.
ورتالىق بالاعا تۋعانىنان دامۋ مەن وقۋدىڭ بارلىق ساتىلارىنان وتۋگە مۇمكىندىك بەرەدى. سونىمەن قاتار، ينكليۋزيۆتى ءبىلىم بەرۋ سالاسىنداعى مامانداردى دايىنداۋعا جانە داۋن سيندرومى بار ادامداردى جۇمىسقا ورنالاستىرۋ جول اشادى.
«داۋن سيندرومى بار جاندارعا ارنالعان ورتالىقتىڭ اشىلۋى الماتى ءۇشىن عانا ەمەس، بۇكىل قازاقستانعا ماڭىزدى وقيعا. اتالمىش نىسان باسقا قالالار مەن وبلىستارعا ەرەكشە ۇلگى بولاتىنى انىق. وسىنداي ورتالىقتاردى باسقا وڭىرلەردە دە اشۋ جوسپارىمىزدا بار. جوبانىڭ ىسكە اسۋىنا قارجىلىق قولداۋ كورسەتىپ وتىرعان سەرىكتەستەرىمىزگە العىسىمىزدى جەتكىزەمىز»، - دەدى ءوز كەزەگىندە ورتالىقتىڭ ديرەكتورى گۆيدو ترەسساني.