بۇگىن، «سامۇرىق-قازىنا» اق 15 جىلدىعىنا وراي، پەدياتريا جانە بالالار حيرۋرگياسى عىلىمي ورتالىعىنىڭ ونكولوگيا بولىمىنە قان قۇرامىن وڭدەۋگە قاجەت «Radgil 2» قوندىرعىسى تابىستالدى،-دەپ حابارلايدى Almaty-akshamy.kz.
مالىمەتكە سۇيەنسەك، قازاقستاندا جىل سايىن 600-گە جۋىق بالا قاتەرلى ىسىكپەن اۋىرادى. تيىسىنشە، حالىقارالىق ستاندارتتارعا سايكەس، ونكولوگيالىق اۋرۋلاردى دياگنوستيكالاۋ مەن ەمدەۋدىڭ جوعارى تەحنولوگيالىق ادىستەرىنىڭ قولجەتىمدىلىگىن ودان ءارى ارتتىرۋ تالاپ ەتىلۋدە.
سوڭعى جىلداردا شەتەلدىك ەمدەۋ شارالارىنا قىزىعۋشىلىق باسىم. ولاردى ەلىمىزدە ەنگىزۋ ماقساتىندا «سامۇرىق-قازىنا» اق كومپانيالار توبىنىڭ ءبىرىڭعاي قايىرىمدىلىق وپەراتورى – «Samruk-Kazyna Trust» قورى مەديسينا مەكەمەسىنە قاجەتتى جابدىقتى الۋعا قارجىلاي قولداۋ كورسەتتى. ناتيجەسىندە قاسيەتتى قۇربان ايت مەرەكەسى قارسانىندا پەدياتريا جانە بالالار حيرۋرگياسى عىلىمي ورتالىعىنا رەنتگەن جۇيەسى تاپسىرىلدى.
«Radgil 2» قوندىرعىسى قان كومپونەتتەرىنىڭ اينالمالى ىدىستا بىركەلكى ساۋلەلەنۋىن قامتاماسىز ەتەدى. ارنايى جاسالعان سىيىمدىلىق ءبىر ۋاقىتتا بىرنەشە كونتەينەردى وڭدەۋگە مۇمكىندىك بەرەدى (پروسەدۋرا ءۇشىن 1800 مل-گە دەيىن). ولاردى مۇمكىندىگىنشە بىركەلكى ساۋلەلەندىرىپ، ترومبوسيتتەردىڭ اگرەگاسياسىن بولدىرمايدى. باسقارۋ تاقتاسى قاراپايىم، جىلدام جانە ىڭعايلى پايدالانۋعا مۇمكىندىك بەرەتىن ەرگونوميكالىق ديزاينعا يە. سەنسورلىق ەكرانمەن جانە ءينتۋيتيۆتى مازىرمەن ەرەكشەلەنەدى. قۇرىلعى وڭدەلەتىن ماتەريالداردى ورنالاستىرۋ جۇيەسىمەن، ارنايى جوعارى جيىلىكتى رەنتگەن گەنەراتورى جانە پروسەدۋرالىق دەرەكتەردى ەنگىزۋ مەن ءتيىستى اقپاراتتى كورسەتۋ ءۇشىن LCD ينتەرفەيسى بار ەكراندالعان بولىمنەن تۇرادى.
ورناتىلعان قۇرىلعى ارقىلى ونكولوگيالىق اۋرۋلارى بار 2000 بالاعا ەم شارالارى جاسالادى.