الماتى وبلىسىندا بولعان كوكپار ويىنى كەزىندە تۇسىرىلگەن قاندى ۆيدەو الەۋمەتتىك جەلىدە رەزونانس تۋدىردى، - دەپ حابارلايدى اqshamnews.kz ءتىلشىسى.
ۆيدەودا كوكپار ويىنى كەزىندە اتتىڭ اۋىزىنان قان اعىپ جاتقان ءسات كورىنەدى. بۇل كادرلاردان كەيىن كوپتەگەن قولدانۋشى كوكپاردى «قاتىگەز سپورت» دەپ اتاپ، ونى مۇلدە توقتاتۋدى تالاپ ەتىپ جاتىر.
نە بولدى؟
وقيعا قاراساي اۋدانىنداعى ات كلۋبتارىنىڭ بىرىندە بولعان. جەلىدە تاراعان ۆيدەودان كەيىن ادامدار ىشكى ىستەر مينيسترلىگىنە e-Otinish پورتالى ارقىلى جاپپاي شاعىم ءتۇسىردى. سونىمەن قاتار، اتالعان كلۋبتىڭ 2گيس قوسىمشاسىنا جەلى قولدانۋشىلارى تەرىس پىكىرلەر جاۋدىردى. كلۋبتىڭ رەيتينگى 4،9 جۇلدىزدان 1،3-كە دەيىن تومەندەدى. كلۋب وكىلدەرى جاراقاتتىڭ اۋىر ەمەستىگىن ايتىپ، «كورگەندەرگە جاي شامادان تىس كورىندى» دەپ ءتۇسىندىردى.
سۋرەت: جەلىدەن
فەدەراسيانىڭ جاۋابى
قازاقستان كوكپار فەدەراسياسىنىڭ پرەزيدەنتى ايداربەك حودجانازاروۆ وقيعاعا اتتىڭ دۇرىس دايىندالماۋى مەن جابدىقتىڭ تالاپقا ساي بولماۋى سەبەپ بولعانىن ايتتى.
"مۇنداي جاراقاتتار كوبىنە دايىندىقتىڭ دۇرىس جۇرگىزىلمەۋى مەن جابدىق ساپاسىنىڭ تومەندىگىنەن بولادى. بۇل تەك كوكپارعا ءتان ەمەس، وزگە ات سپورتى تۇرلەرىندە دە كەزدەسەدى. سوندىقتان بۇكىل كوكپاردى ايىپتاۋ دۇرىس ەمەس، ناقتى جاعدايدى زەرتتەۋ كەرەك"، – دەدى ول.
فەدەراسيا باسشىسى كوپتەگەن بەيرەسمي جارىستار ەرەجەنى ساقتاماي وتكىزىلەتىنىن اتاپ ءوتتى:
"ءبىز مۇنداي وقيعالاردى مۇقيات تەرگەپ، ۇيىمداستىرۋشىلار جاۋاپكەرشىلىككە تارتىلۋى كەرەك دەپ سانايمىز" دەدى ول.
ايداربەك حودجانازاروۆ فەدەراسيا قاۋىپسىزدىك ستاندارتتارىن جاڭارتىپ جاتقانىن جانە كوكپاردى بارىنشا ءقاۋىپسىز ەتۋگە كۇش سالاتىنىن جەتكىزدى:
"كوكپار - ۇلتتىق سپورت جانە مادەنيەتىمىزدىڭ ءبىر بولىگى. مىندەتىمىز - ءداستۇردى ساقتاي وتىرىپ، ويىنداردى زاماناۋي ءارى ءقاۋىپسىز ەتۋ"، - دەپ قوستى مامان.
تەرگەۋ ءجۇرىپ جاتىر
الماتى وبلىستىق پوليسيا دەپارتامەنتى بۇل جاعداي بويىنشا تەكسەرۋ باستالعانىن حابارلادى.