«اۋەزوۆ ءۇيى» عىلىمي-مادەني ورتالىعىندا م.و.اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى، PhD دوكتورانتى، اقىن باۋىرجان مىرزاقۇلدىڭ جۋىردا جارىق كورگەن «تولۋناي» جىر جيناعى مەن «قوجا احمەت ياساۋي كىم؟» اتتى تانىمدىق كىتابىنىڭ تۇساۋكەسەر ءراسىمى ءوتتى.
سونداي-اق جاس عالىم باۋىرجان مىرزاقۇلدىڭ وسى جىلدىڭ باسىندا تاشكەنتكە بارعان ءىسساپارىندا تاپقان قوجا احمەت ءياساۋيدىڭ «قۇدىرەتناما» شىعارماسى جانە «سوڭعى سانى بىردەي سانداردى كوبەيتۋدىڭ وڭتايلى ءتاسىلى» اتتى كىتاپشاسىنىڭ مازمۇنى تانىستىرىلدى.
ءىس-شارانى م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى، فيلولوگيا عىلىمدارىنىڭ دوكتورى، ق ر ۇعا اكادەميگى ماتىجانوۆ كەنجەحان ءىسلامجان ۇلى جۇرگىزدى.
باسقوسۋدا «قوجا احمەت ياساۋي كىم؟» كىتابىنىڭ جارىققا شىعۋىنا قارجىلاي قولداۋ كورسەتكەن مەسەنات، «الماتىمەتروقۇرىلىس» اق كومپانياسىنىڭ باسشىسى، كاسىپكەر قايرات رەيموۆ، الەمدىك بەستسەللەر كىتاپتاردى قازاق تىلىندە سويلەتىپ جۇرگەن «مازمۇنداما» جوباسىنىڭ اۆتورى، گارۆارد ۋنيۆەرسيتەتىنىڭ تۇلەگى شىڭعىس مۇقان، «بالدىرعان» جۋرنالىنىڭ اعا ءتىلشىسى، اقىن قۇل-كەرىم ەلەمەس، م.و.اۋەزوۆ اتىنداعى ادەبيەت جانە ونەر يسنيتۋتىنىڭ باس عىلىي قىزمەتكەرى، اۋەزوۆتانۋشى-عالىم گۇلزيا ءپىرالى، يسلام عىلىمي-زەرتتەۋ ينستيتۋتىنىڭ ديرەكتورى، ف.ع.ك. ءتورالى قىدىر وزدەرىنىڭ جۇرەكجاردى لەبىزدەرىن ءبىلدىردى.
م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى، تاۋەلسىزدىك داۋىردەگى ادەبيەت جانە كوركەم پۋبليسيستيكا ءبولىمىنىڭ مەڭگەرۋشىسى، ف.ع.د.، قازاقستان جازۋشىلار وداعىنىڭ مۇشەسى گۇلجاھان وردا جاس اقىن ب.مىرزاقۇلدىڭ شىعارماشىلىعى تۋرالى ءسوز سويلەدى. ال ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەكتەرى ەسەنگەلدييەۆ ساكەن مەن ءاسىپباي نۇرگەلدى اندەر ورىندادى.
تۇساۋكەسەر راسىمىنە ينستيتۋتتىڭ عىلىمي قىزمەتكەرلەرى، بەلگىلى قالامگەرلەر جانە ستۋدەنت جاستار قاتىستى.
–ءبىزدى جاستاردىڭ ءوسىپ-ونىپ وركەندەگەنى قۋانتادى. عىلىم مەن شىعارماشىلىقتى قاتار ۇستاپ ەڭبەكتەنىپ جۇرگەن باۋىرجان سياقتى جىگىتتەر قاتارى كوبەيە بەرسىن. تەك ەڭبەك ەتۋ كەرەك. ادام ەڭبەكتەنسە ءبارى بولادى، – دەدى م.و.اۋەزوۆ اتىنداعى ادەبيەت جانە ونەر ينستيتۋتى باس ديرەكتورى ك.ماتىجانوۆ.