م.و. اۋەزوۆ اتىنداعى ادەبيەت جانە ونەر ينستيتۋتىنىڭ 90 جىلدىق مەرەيتويىنا وراي استانا قالاسىنداعى كۇندەرى اياسىندا ينستيتۋت عالىمدارى قازاق ۇلتتىق حورەوگرافيا اكادەمياسىنىڭ ۇجىمىمەن ارىپتەستىك كەزدەسۋ وتكىزدى.
ارىپتەستىك كەزدەسۋ-سۇحباتتا ينستيتۋت باس ديرەكتورىنىڭ عىلىم جونىندەگى ورىنباسارى، فيلولوگيا عىلىمدارىنىڭ كانديداتى قالييەۆا الميرا قايىرتاي قىزى، ينستيتۋتتىڭ جەتەكشى عىلىمي قىزمەتكەرى، ونەرتانۋ كانديداتى مۇقان امانكەلدى ورازباي ۇلى، عالىم حاتشى، Phd كەندجاكۋلوۆا اينۇر بەرىك قىزى سونداي-اق، قازاق ۇلتتىق حورەوگرافيا اكادەمياسىنىڭ «ونەرتانۋ جانە ارت-مەنەدجمەنت» كافەدراسىنىڭ پروفەسسورى فيلولوگيا عىلىمدارىنىڭ دوكتورى تولىسبايەۆا جاننا جەڭىس قىزى، ونەرتانۋ كانديداتى، پروفەسسور جۇماسەيىتوۆا گۇلنار تازابەك قىزى جانە وقىتۋشى-پروفەسسورلىق قۇرامى مەن Phd دوكتورانتتار، ماگيسترانتتار قاتىستى.
كەزدەسۋ بارىسىندا ينستيتۋتتىڭ 90 جىلدىق تاريحى مەن عىلىمي-زەرتتەۋ جۇمىسى جونىندە اقپارات بەرىلىپ، سوڭعى بەس جىلدا جارىق كورگەن عىلىمي ەڭبەكتەر تانىستىرىلدى. اتاپ ايتقاندا، «بەينەلەۋ ونەرى» ءبولىمىنىڭ مەڭگەرۋشىسى، ونەرتانۋ كانديداتى، دوسەنت شاريپوۆا ديليارا سافارعالي قىزىنىڭ جەتەكشىلىگىمەن جارىق كورگەن «ماڭگىلىك ەل» مادەني پاراديگماسى مەن قازاقستان ونەرىنىڭ جاھاندانۋى»، «كۋلتۋرنايا پاميات كاك دۋحوۆنىي رەسۋرس ناسيونالنوي يدەي «ماڭگىلىك ەل» ۆ سوۆرەمەننوم يزوبرازيتەلنوم يسكۋسستۆە ي ارحيتەكتۋرە كازاحستانا»، «قازاقستاننىڭ رۋحاني جاڭعىرۋ كونتەكستىندەگى بەينەلەۋ ونەرى» ۇجىمدىق مونوگرافيالارى، «تەاتر جانە كينو» بولىمىندە، ونەرتانۋ كانديداتى مۇقان امانكەلدى ورازباي ۇلىنىڭ باسشىلىعىمەن شىققان «جاستاردىڭ ۇلتتىق سانا-سەزىمىن قالىپتاستىرۋداعى كوركەمونەردىڭ ءرولى»، «زاماناۋي تەاتر جانە كينو ونەرىندەگى مادەني مۇرانىڭ ساقتالۋى مەن ترانسفورماسيالانۋى» اتتى عىلىمي ەڭبەكتەرى تانىستىرىلدى.
سونداي-اق، ارىپتەستىك كەزدەسۋدە ەكى مەكەمە وكىلدەرى ءوزارا ىنتىماقتاستىق كەلىسىمشارتىن قايتا پىسىقتاپ، عىلىمي جانە مادەني شىعارماشىلىقتى نىعايتۋعا بايلانىستى بىرلەسىپ جۇمىس جاساۋ جوسپارلارىمەن ءبولىستى.