دۇنيەجۇزىلىك دەنساۋلىق ساقتاۋ ۇيىمى ساپاسىز دارى-دارمەكتەن جىلىنا 1 ميلليون ادامعا دەيىن كوز جۇماتىنىن ايتادى.
دارىلىك زاتتاردى سيفرلىق تاڭبالاۋدىڭ ءبىرىنشى كەزەڭى قىركۇيەك ايىنان باستاپ كۇشىنە ەنەدى، دەپ حابارلايدى Almaty-akshamy.kz
وسىلايشا كەز كەلگەن ءدارىنىڭ زاڭدى نەمەسە زاڭسىز شىعارىلعانىن تەكسەرە الاسىز.
ەل ۇكىمەتى دارىلىك پرەپاراتتاردى تاڭبالاۋدىڭ ءتاريفىن بەكىتتى. العاشقى كەزەڭگە 90 اتاۋ ەنگىزىلگەن. كەلەر جىلدىڭ سوڭىنا دەيىن بارلىق دارى-دارمەك سيفرلىق ماركالاۋدان وتەدى. تاۋەلسىز ساراپشىلاردىڭ مالىمەتىنشە، ەلىمىزدە دارى-دارمەكتىڭ زاڭسىز اينالىمى 12%. بۇل ونداعان ملرد تەڭگەگە جەتۋى مۇمكىن.
ال الەمدە كونترافاكتىلى ءدارىنىڭ ۇلەسى 20% شاماسىندا. دۇنيەجۇزىلىك دەنساۋلىق ساقتاۋ ۇيىمى ساپاسىز دارى-دارمەكتەن جىلىنا 1 ميلليون ادامعا دەيىن كوز جۇماتىنىن ايتادى.
«سيفرلىق تاڭبالاۋ ەنگىزەتىن ءتىزىم وتە ۇلكەن. دارىلىك زاتتار مىندەتتى تاڭبالاۋعا جاتاتىن ماڭىزدى تاۋارلار توبىنىڭ قاتارىنا كىرەدى. ءتيىستى نورماتيۆتىك قۇجاتتار بەكىتىلدى. قىركۇيەك ايىندا كۇشىنە ەنەتىن بۇيرىققا ساي، ءبىرىنشى كەزەڭدە 90 اتالىمنان تۇراتىن دارى-دارمەك تاڭبالانادى. بۇل - فارماسيەۆتيكا سالاسىنداعى قاۋىمداستىقپەن انىقتالىپ، كەلىسىلگەن جانە دەنساۋلىق ساقتاۋ مينيسترلىگى بەكىتكەن ءتىزىم. مىندەتتى سيفرلىق تاڭبالاۋ ەنگىزىلگەنگە دەيىن ءدارىحانا سورەسىنە تۇسكەن ءونىم جارامدىلىق مەرزىمى اياقتالعانعا دەيىن ساتۋعا جاتادى. جاڭا ءتارتىپ 2023 جىلدىڭ اياعىنا دەيىن دارىلىك پرەپاراتتاردىڭ 100%-ىن كەزەڭ-كەزەڭمەن تاڭبالاۋدى كوزدەيدى»، - دەيدى سيفرلىق ەكونوميكانى دامىتۋ ورتالىعىنىڭ باس ديرەكتورى بيكەش قۇرمانعالييەۆا.
مامانداردىڭ ايتۋىنشا، وتاندىق دارى-دارمەك ءوندىرۋشى ءىرى جانە ۇساق كومپانيالار پيلوتتى نەگىزدە جۇيەگە دايىن. ال يمپورتتىق ءونىم ءوندىرۋشى ەلدەگى زاۋىتتاردا تاڭبالانادى.
«مىندەتتى ماركالاۋعا جاتاتىن ونىمدە داتا ماتريكس كود بولماسا، ونىڭ زاڭسىز ەكەنىن بىلدىرەدى. رەەسترگە ەنگىزىلمەگەن تاۋاردان كۇماندانۋعا بولادى. ءموبيلدى قوسىمشا ارقىلى سكانەرلەپ، ونىڭ نارىقتاعى رۇقسات ەتىلگەن شەكتى باعاسىن دا تەكسەرە الاسىز. قىركۇيەك ايىندا ءبىز وسى 90 اتالىم دارى-دارمەكتى تاڭبالاۋدى باستايمىز. ياعني قازاقستان اۋماعىندا ساتۋعا رۇقسات ەتىلمەگەن پرەپاراتتاردىڭ اينالىمىنا توسقاۋىل بولادى. بۇل - ءسىزدىڭ ءتيىستى باقىلاۋدان وتكەن ساپالى دارى-دارمەككە قول جەتكىزۋىڭىزگە كەپىلدىك»، - دەيدى مامان.