جيگۋلي دايرابايەۆ الماتىداعى جاس ماماندارمەن اگرارلىق سەكتوردى دامىتۋ ماسەلەلەرىن تالقىلادى.
پرەزيدەنتتىككە كانديدات قازاق ۇلتتىق اگرارلىق زەرتتەۋ ۋنيۆەرسيتەتىنىڭ ستۋدەنتتەرىمەن، وقىتۋشىلارىمەن جانە قىزمەتكەرلەرىمەن كەزدەستى.
كانديدات الەمنىڭ جەتەكشى اگرارلىق دەرجاۆالارىنىڭ تاجىريبەسى اۋىل شارۋاشىلىعىن تابىستى دامىتۋ تەك عىلىم، ءبىلىم، ءوندىرىستىڭ ينتەگراسياسى نەگىزىندە عانا مۇمكىن ەكەنىن كورسەتىپ وتىرعانىن اتاپ ءوتتى. ونىڭ ايتۋىنشا، ءبىزدىڭ فەرمەرلەر يننوۆاسيالىق تەحنولوگيالاردى، جاڭا جوعارى ءونىمدى سورتتاردى، جوعارى ءونىمدى تۇقىمداردى تەزىرەك ەنگىزگەن جاعدايدا عانا قازاقستان ازىق-تۇلىك قاۋىپسىزدىگىن قامتاماسىز ەتە الادى.
- وكىنىشكە وراي، عىلىمي-زەرتتەۋ قىزمەتىنىڭ ساپالى ناتيجەلەرى اگرارلىق وندىرىسكە جەتپەيدى. ىسكە اسىرۋ جۇيەسى جۇمىس ىستەمەيدى. كوممەرسيالاندىرۋ جانە ترانسفەرت ورتالىقتارىن، فەرمەرلەرگە جاڭا تەحنولوگيالار، جاڭا سورتتار مەن تۇقىمدار تۋرالى ءبىلىم بەرۋ ورتالىقتارىن قۇرۋعا ەرەكشە نازار اۋدارا وتىرىپ، عىلىمنىڭ ۇيىمدىق قۇرىلىمىن وزگەرتۋ قاجەت. ناقتى جۇمىس ىستەيتىن عالىمدار لايىقتى ەڭبەكاقى الۋى ءۇشىن اگرارلىق عىلىمدى قارجىلاندىرۋ سحەماسىن وزگەرتۋ قاجەت، – دەيدى جيگۋلي دايرابايەۆ.
ول سونداي-اق عىلىمي زەرتتەۋلەردى قارجىلاندىراتىن اگروقۇرىلىمداردى ىنتالاندىرۋ ماسەلەلەرى بويىنشا زاڭناماداعى وزگەرىستەردى قيسىندى سوڭىنا دەيىن جەتكىزۋ قاجەتتىگىن اتاپ ءوتتى.
كەزدەسۋ بارىسىندا كانديدات عىلىمي-زەرتتەۋ ينستيتۋتتارىن قارجىلاندىرۋ كەشەندى جانە جۇيەلى بولۋى ءتيىس ەكەنىن ايتا كەلىپ، ەلدەگى عىلىمي قىزمەتتىڭ دامۋىنا بارىنشا كۇش سالۋعا نيەتتى ەكەندىگىنە سەندىردى.
ەستەرىڭىزگە سالا كەتەيىك، سايلاۋ ناۋقانى 21 قازاندا باستالىپ، سايلاۋعا ءبىر كۇن قالعاندا، ياعني، 19 قاراشادا اياقتالادى. بۇل كۇن رەسپۋبليكا بويىنشا تىنىشتىق كۇنى بولادى. پرەزيدەنت سايلاۋى 20 قاراشادا وتەدى.