الماتىداعى №7 قالالىق كلينيكالىق اۋرۋحانا دارىگەرلەرى جاس جىگىتتىڭ باۋىرىنا بىتكەن پارازيتارلى كيستاعا وتا جاساپ، پاسيەنتتىڭ ءومىرىن ساقتاپ قالدى. بۇل تۋرالى اۋرۋحانانىڭ باسپا ءسوز قىزمەتى حابارلادى.
حابارلاماعا سۇيەنسەك، 27 جاستاعى جىگىت قالقامان اۋرۋحاناسىنا جەتىسۋ وبلىسىنان كەلگەن. تەكسەرۋ بارىسىندا دارىگەرلەر باۋىردىڭ سول جاق بولىگىندە ۇلكەن وسكىن پايدا بولعانىنا كوز جەتكىزگەن. سالماعى 2 كەلىدەن اساتىن كيستانىڭ ديامەترى 15 سانتيمەتردى قۇرايدى.
اناسىنىڭ ايتۋىنشا، باۋىرعا بىتكەن وسكىندى جەرگىلىكتى ماماندار وسى جىلدىڭ تامىز ايىندا انىقتاپتى.
«ءبىز اۋىلدا تۇرامىز. دارىگەرلەر مىندەتتى الەۋمەتتىك مەديسينالىق ساقتاندىرۋ ارقىلى تەگىن وتا جاساتىپ، الىپ تاستاۋعا بولاتىنىن ايتتى. ءبىراق كەيبىر كلينيكالار مۇنداي وپەراسيانى جاساۋدان باس تارتتى. سەبەبى بۇل كۇردەلى وپەراسيا، ونىڭ ۇستىنە بالام مۇگەدەك. تانىستاردان الماتىداعى 7-اۋرۋحانا جاسايدى دەگەندى ەستىپ، وسىندا كەلدىك»، - دەيدى ناۋقاستىڭ اناسى.
اۋرۋحانانىڭ №1 حيرۋرگيا بولىمشەسى مەڭگەرۋشىسى نۇرلان ماۋلەنوۆ اۋرۋ ۇساق تاسپا قۇرتتاردان پايدا بولاتىنىن ايتادى. بىرتىندەپ ىشكى اعزالار زاقىمدانىپ، ەحينوكوكك كيستاسى پايدا بولادى. ول كەز-كەلگەن ۋاقىتتا جارىلىپ كەتۋى مۇمكىن. سوندىقتان بۇل ادام ءومىرى ءۇشىن اسا ءقاۋىپتى دياگنوزدار قاتارىنا جاتادى.
«باۋىرعا ەحينوكوكەكتوميا دەپ اتالاتىن وتا جاسالدى. وپەراسيا بارىسىندا قۇرت جينالعان وسكىن الىپ تاستالىپ، پاسيەنتتىڭ ءىش قۇرىلىسى زارارسىزداندىرىلدى. وتا شامامەن 4،5 ساعاتقا سوزىلدى. ادەتتە مۇنداي وپەراسيالاردى جاساعاندا كيستانى اشۋعا تۋرا كەلەتىن. بۇل جولى باۋىردىڭ سول جاق بولىگىندەگى وسكىندى اشپاي، توڭىرەگىندەگى ورگاندار مەن تىندەردەن اجىراتىپ الدىق»، - دەيدى دارىگەر.
حيرۋرگيالىق وتا ءساتتى ءوتتى. ءقازىر ناۋقاستىڭ جاعدايى جاقسى، اۋرۋحانادان شىقتى. الداعى ۋاقىتتا ول امبۋلاتوريالىق باقىلاۋدا بولماق.