نارەستەنىڭ جەدەل سۋبدۋرالدى گەماتوما، سول جاق ميىنىڭ ءىسىنۋى، ينسۋلت العانى انىقتالدى
ماڭعىستاۋ وبلىستىق كوپبەيىندى بالالار اۋرۋحاناسىنىڭ دارىگەرلەرى تۋعانىنا 39 كۇن بولعاندا ينسۋلت العان نارەستەنى امان الىپ قالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
2022 جىلدىڭ جەلتوقسان ايىندا دۇنيەگە كەلگەن ءسابي 13 قاڭتار كۇنى وتە اۋىر حالدە بالالار اۋرۋحاناسىنىڭ جانساقتاۋ بولىمىنە جەتكىزىلگەن. نارەستەنى تولىق تەكسەرگەن دارىگەرلەر «مي قان اينالىمى جۇيەسىنىڭ بۇزىلۋى» دياگنوزىن قويعان.
«13 قاڭتاردا تۋعانىنا 39 كۇن بولعان ءسابي «مي قان اينالىمى جۇيەسىنىڭ بۇزىلۋى» دياگنوزىمەن اۋرۋحاناعا ءتۇستى. نارەستەنىڭ جەدەل سۋبدۋرالدى گەماتوما، سول جاق ميىنىڭ ءىسىنۋى، ينسۋلت العانى انىقتالدى. جەدەل تۇردە شەشىم قابىلدانىپ، شۇعىل تۇردە وتا جاسالدى. ءبىر ساعاتقا سوزىلعان وتا ءساتتى ءوتتى»،- دەدى بالالار نەيروحيرۋرگى ەربول كەنجيەۆالوۆ.
ءقازىر بالانىڭ جاعدايى تۇراقتى. ءسابي ۇيگە شىعارىلعان، اتا-اناسىنىڭ جانە دارىگەردىڭ باقىلاۋىندا.