وڭتۇستىك استاناداعى №2 قالالىق كلينيكالىق بالالار اۋرۋحاناسىنىڭ ورتوحيرۋرگتەرى رەسەيدىڭ ن.پيروگوۆ اتىنداعى جوعارى مەديسينالىق تەحنولوگيالار كلينيكاسى ماماندارىمەن بىرلەسكەن شەبەرلىك كلاسى اياسىندا كۇردەلى ورتوپلاستيكالىق وتا جاسادى.
اۋرۋحانا باسپا ءسوز قىزمەتىنىڭ مالىمەتىنشە، قىز بالا پوليداكتيليانىڭ كۇردەلى تۇرىمەن تۋعان. ونىڭ وڭ قولىنداعى باس بارماعى قوسارلانىپ كەتكەن. مامانداردىڭ سوزىنە سۇيەنسەك، ارتىق ساۋساقتى الىپ تاستاۋ وڭاي شارۋا ەمەس. ول ءۇشىن قولدىڭ ەمبريولوگياسىن جەتىك ءبىلۋ قاجەت. ونىڭ ۇستىنە، ىشتەي كەمىستىك سالدارىنان قوسارلانىپ كەتكەن باس بارماقتىڭ ءپىشىنى بۇزىلىپ، تىم جىڭىشكەرىپ كەتكەن ەكى ساۋساقتان باس بارماق جاساۋ قاجەت بولدى.
كلينيكادا وتكەن بەس كۇندىك شەبەرلىك كلاسى بارىسىندا اياق-قول كەمىستىگىمەن تۋعان نەمەسە باسقا دا كۇردەلى دياگنوز قويىلعان قازاقستاندىق 5 بالاعا وتا جاسالدى. بىرنەشە ساعاتقا سوزىلعان كۇردەلى وپەراسيالار مىندەتتى الەۋمەتتىك مەديسينالىق ساقتاندىرۋ قاراجاتى ەسەبىنەن جاسالدى.
«رەسەيلىك ارىپتەستەر بىزگە «ميلوسەرديە» قورىنىڭ شاقىرتۋىمەن كەلدى. شەبەرلىك كلاسىنا الماتى، پاۆلودار، قاراعاندى، تالدىقورعان، الماتى وبلىسىنىڭ بالالار ورتوپەدتەرى، ورتوحيرۋرگتەر، انەستيزيولوگتار دا قاتىستى. كۇردەلى ورتوپلاستيكالىق جانە قالپىنا كەلتىرۋگە باعىتتالعان وتالارعا قوسا، كوپتەگەن بالالار بىلىكتى مامانداردان كەڭەس الدى»، - دەيدى №2 قبكا ديرەكتورى مارات راباندياروۆ.
ءبىر ايتا كەتەرلىگى، وپەراسيالار جەرگىلىكتى جانسىزداندىرۋدىڭ بىرەگەي تەحنولوگياسىن قولدانا وتىرىپ جاسالدى.
«بۇل تەحنولوگيا بارىسىندا پروسەستى تولىعىمەن ۋدز قۇرالى ارقىلى باقىلاپ وتىرۋ قاجەت. ول جانسىزداندىرۋ كەزىندە قولدانىلاتىن ناركوز مولشەرىن ازايتۋعا مۇمكىندىك بەرەدى. بالا تەز ەسىن جيىپ، ناركوزدىڭ كەرى اسەرى ازايادى. بالا وپەراسيا زالىندا ويانادى»، - دەيدى اۋرۋحانانىڭ تراۆماتولوگيا بولىمشەسى مەڭگەرۋشىسى ەرلان سادىربالين.