قازاقستاندىق بوكسشى انگەلينا لۋكاس (5-1، 2 كو) باكۋدە (ازەربايجان) كاسىپقوي بوكس كەشىندە ونەر كورسەتىپ، پاكىستاندىق سپورتشىنى ءبىرىنشى راۋندتا نوكاۋتپەن جەڭدى، دەپ حابارلايدى اlmaty-akshamy.kz.
انگەلينا لۋكاس پاكىستاندىق روما يۋسۋفپەن (5-0-1، 2 كو) كەزدەستى. بۇل جەكپە-جەك جەڭىل سالماق دارەجەسىندە ءوتتى جانە سەگىز راۋندقا جوسپارلانعان بولاتىن. جەكپە-جەكتە لۋكاس ءبىرىنشى راۋندتا نوكاۋتپەن جەڭىپ، WIBA الەم تيتۋلىن يەلەندى.
مەن ءبارىڭىزدى قاتتى جاقسى كورەمىن جانە سىزدەرگە جاقسى جاڭالىق ايتقىم كەلەدى، ءبىز مۇنى جاسادىق! بۇگىن مەن ەكىنشى الەم چەمپيونى اتاعىن جەڭىپ الدىم جانە مەنىڭ ماقساتىم ءابسوليۋتتى چەمپيون بولۋ! العا قازاقستان!، – دەپ جازدى لۋكاس.
وسىلايشا، انگەلينا لۋكاس كاسىپقوي رينگتەگى التىنشى جەڭىسىنە قول جەتكىزىپ، WIBA بەلبەۋىنە قول جەتكىزسە، روما يۋساف سپورتتىق مانسابىنداعى العاشقى جەڭىلىسىنە ۇشىرادى. بۇعان دەيىن لۋكاس WBC International جانە UBO چەمپيوندىق بەلبەۋلەرىن دە جەڭىپ العان بولاتىن.
جەكپە-جەكتەن كەيىن لۋكاس Instagram الەۋمەتتىك جەلىسىندە قارسىلاسىنا جەكپە-جەك ءۇشىن العىسىن ءبىلدىرىپ، بىرگە تۇسكەن سۋرەتىن جاريالادى.