پاسيەنتتىڭ ومىرىنە كەلەر ءقاۋىپ جوق
شىمكەنت قالالىق بالالار كلينيكالىق اۋرۋحاناسىنىڭ دارىگەرلەرى العاش رەت بۇيرەكتەگى ەحينوكوكك كيستاسىنا لاپاروسكوپيالىق ادىسپەن وپەراسيا جاسادى، دەپ حابارلايدى Almaty-akshamy.kz.
تىلىكسىز وتا كەزىندە دارىگەرلەر 17 جاستاعى ناۋقاستىڭ بۇيرەگىنىڭ جوعارعى پوليۋسىنان شامامەن 5،0*6،0 سم كيستوزدى ماسسانى الدى.
قالالىق بالالار كلينيكالىق اۋرۋحاناسىنا 2003 جىلعى ناۋقاس سول جاق بەل ايماعىنداعى اۋىرسىنۋ، السىزدىك تۋرالى شاعىمدارمەن جوسپارلى تۇردە حيرۋرگيا بولىمىنە جاتقىزىلدى. انامنەزدە بالاعا 2020 جىلدىڭ اقپان ايىندا باۋىرداعى ەحينوكوكك كيستاسىنا وپەراسيا جاسالعانى انىقتالدى. ناۋقاس وسى وتادان كەيىن ديسپانسەرلىك باقىلاۋعا الىنىپ، جىلىنا 2 رەت جوسپارلى تەكسەرۋدەن ءوتىپ تۇرعان. سوڭعى 1 اي شاماسىندا جوعارىدا اتالعان شاعىمداردىڭ مازالاۋىنا بايلانىستى ءىش قۋىسىنىڭ ۋلترادىبىستىق زەرتتەۋى جانە ءىشتىڭ مرت سكانەرى جاسالدى.
تەكسەرۋ بارىسىندا سول جاق بۇيرەكتىڭ كيستالىق ءتۇزىلىسى انىقتالدى. قالالىق كلينيكالىق بالالار اۋرۋحاناسىنىڭ حيرۋرگ دارىگەرلەرىنىڭ تەكسەرۋىنەن كەيىن جوسپارلى وتا جاسالۋىنىڭ قاجەتتىلىگى تۋرالى كەڭەس بەرىلدى.
«ناۋقاسقا سول جاق بۇيرەكتىڭ لاپاروسكوپيالىق ەحينوكوككەكتومياسى وتاسى جاسالدى. وتا كەزىندە سول جاق بۇيرەكتىڭ جوعارعى پوليۋسىندە شامامەن 5،0*6،0 سم كيستوزدى ءتۇزىلىس انىقتالدى. ەحينوكوكك كيستاسىنىڭ قابىرعاسى اشىلىپ، ءحيتيندى قابىقشاسى لاپاروسكوپيالىق جولمەن الىنىپ تاستالدى»، - دەيدى وتا جاساعان حيرۋرگ اكىم تۇلكىبايەۆ.
وپەراسيا ءساتتى وتكەن. پاسيەنتتىڭ ومىرىنە كەلەر ءقاۋىپ جوق. اراعا ءبىر اپتا سالىپ، وتا جاسالعان ناۋقاس ۇيىنە شىعارىلعان. قازىرگى جاعدايى جاقسى.