كىتاپتى جازۋ كەزىندە اۆتور قازاقستانعا بارىپ، تىكەلەي كۋاگەرلەرمەن، وقيعالارعا قاتىسۋشىلارمەن جەكە كەزدەسكەن.
رەسەيدەگى قازاقستان ەلشىلىگىندە لەونيد ملەچيننىڭ «تراگيچەسكيي يانۆار. پرەزيدەنت توكايەۆ ي يزۆلەچەنيە ۋروكوۆ» كىتابى تانىستىرىلدى، دەپ حابارلايدى Almaty-akshamy.kz قازاقپارات-قا سىلتەمە جاساپ.
جيىننىڭ اشىلۋىندا قازاقستاننىڭ رەسەيدەگى توتەنشە جانە وكىلەتتى ەلشىسى ەرمەك كوشەربايەۆ كەلۋشىلەرگە 2022 جىل ميلليونداعان قازاقستاندىقتار ءۇشىن ادەتتەگىدەي ءومىر سالتىن وزگەرتكەن، ولاردىڭ ءومىرىن «بۇرىن» جانە «كەيىن» دەپ بولگەن وقيعالارمەن ەستە قالعانىن ايتتى.
«ءبىز ەلىمىزدىڭ تاۋەلسىز دامۋ تاريحىنداعى اسا قايعىلى ءساتتى باستان وتكەردىك. شىن مانىندە، رەسپۋبليكانىڭ مەملەكەتتىلىگى مەن ەگەمەندىگىنە قاتەر ءتوندى»، - دەدى ەرمەك كوشەربايەۆ.
ديپلوماتيالىق وكىلدىك باسشىسىنىڭ ايتۋىنشا، سوڭعى ايلاردا ب ا ق پەن بلوگوسفەرادا كوپتەگەن ماقالالار مەن جاريالانىمدار شىققان، ءبىراق شىن مانىندە قاڭتارداعى وقيعالاردىڭ سەبەپتەرى مەن جاعدايلارىن تەرەڭ تۇسىنۋگە ارەكەت بولعان جوق. بۇل ولقىلىقتى ءوزىنىڭ زەرتتەۋىندە ايگىلى رەسەيلىك جۋرناليست، پۋبليسيست لەونيد ملەچين تولتىرۋعا تىرىسقان.
«كىتاپتى جازۋ كەزىندە اۆتور قازاقستانعا بارىپ، تىكەلەي كۋاگەرلەرمەن، وقيعالارعا قاتىسۋشىلارمەن جەكە كەزدەسكەن، قۇجاتتاردى زەرتتەپ، بولعان وقيعانىڭ ايقىن بەينەسىن جاساۋ ءۇشىن وقيعا ورىندارىنا بارعان. وقىرماندار كىتاپتان بۇرىن كوپشىلىككە جاريالانباعان كوپتەگەن فاكتىلەردى بىلە الادى»، - دەدى ق ر ەلشىسى.
اۆتوردىڭ ايتۋىنشا، بۇل كىتاپ سول كەزەڭدەگى وقيعالاردى سيپاتتاۋدان، قاتىسۋشىلارمەن جانە كۋاگەرلەرمەن – پوليسەيلەرمەن، تۇزاققا تۇسكەن ادامدارمەن، زارداپ شەككەندەرمەن جانە كەرەمەت باتىلدىق تانىتقاندارمەن سۇحباتتان قۇرالعان.
«قاڭتار ايىنداعى وقيعالار وراسان زور ماڭىزعا يە، ويتكەنى قازاقستان بىزگە كورشى، سەرىكتەس، وداقتاس جانە دوس مەملەكەت. ءبىز قازاقستاندا ءبارى جاقسى بولاتىنىنا وتە مۇددەلىمىز. بۇل وقيعالار ورتالىق ازياداعى ەڭ تۇراقتى مەملەكەتتە بولدى. بۇل ەلدە كەنەتتەن نە بولعانى وزىمە دە قىزىق بولدى. ەكىنشىدەن، ادامنان وركەنيەتتىڭ وسىنداي جۇقا قاباتى قانداي جىلدامدىقپەن تۇسەتىنىنە تاڭ قالدىم. الماتىدا ماعان ايتقان وقيعالار، سول كەزدە ادامداردىڭ باسىنان وتكەرگەنى مەنى تاڭ قالدىردى. ءۇشىنشىسى، قازاقستاننىڭ تاعدىرى ءبىر ادامعا، ەل پرەزيدەنتىنە بايلانىستى بولدى»، - دەدى لەونيد ملەچين.