قازاقستاندا سيفرلىق تەڭگە 2025 جىلدىڭ سوڭىنا دەيىن قولدانىسقا ەنگىزىلەدى
مۇنى ۇلتتىق بانك ءتوراعاسى مالىمدەدى. بۇگىن پرەزيدەنت قابىلداۋىندا بولعان عالىمجان ءپىرماتوۆ جاڭاشىلدىقتى ەندىرۋ ءۇردىسى ءۇش كەزەڭگە بولىنەدى دەدى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
ازىرلەۋشىلەردىڭ ءبىرى بينۇر جالەنوۆتىڭ سوزىنشە سيفرلىق تەڭگە قازاقستاندىقتارعا 2023 جىلدىڭ سوڭىنا قاراي قولجەتىمدى بولا باستايدى. ءبىرىنشى كەزەكتە مەملەكەتتىك ساتىپ الۋلاردىڭ ءبىر بولىگى كوشىرىلەدى. سونداي-اق كەيبىر جاردەماقىلار مەن الەۋمەتتىك تولەمدەر دە سيفرلىق ۆاليۋتادا اۋدارىلاتىن بولادى. بۇل بيۋدجەت اقشاسىن جۇمساۋداعى اشىقتىقتى قامتاماسىز ەتەدى، دەدى تولەم جانە قارجىلىق تەحنولوگيالاردى دامىتۋ ورتالىعىنىڭ ءتوراعاسى.
"2024 جىلدىڭ سوڭىنا قاراي ءبىز سيفرلىق تەڭگە وفلاين رەجيمىندە قولجەتىمدى بولادى دەپ جوسپارلاپ وتىرمىز، ياعني ازاماتتارىمىز ينتەرنەتسىز-اق سيفرلىق تەڭگەمەن ەسەپ ايىرىسۋ مۇمكىندىگىنە يە بولادى. ال 2025 جىلى پلاتفورمانى ونەركاسىپتىك دەڭگەيگە شىعارىپ، ترانسشەكارالىق ەسەپ ايىرىسۋ مەحانيزمىن پىسىقتايتاتىن بولامىز. تۇتىنۋشىلارعا سمارتفوندارىنا جاڭا قوسىمشالاردى ورناتۋدىڭ قاجەتى بولمايدى. قولدانىستاعى بانك قوسىمشالارىندا سيفرلىق تەڭگە ءۇشىن بولەك ءاميان پايدا بولادى"، - دەدى ق ر ۇلتتىق بانكىنىڭ تولەم جانە قارجىلىق تەحنولوگيالاردى دامىتۋ ورتالىعىنىڭ ءتوراعاسى بينۇر جالەنوۆ.
ۇلتتىق بانك قازاقستاندىقتار اراسىندا ساۋالناما دا جۇرگىزگەن. ناتيجەسىندە، رەسپوندەنتتەردىڭ 60 پايىزى سيفرلىق تەڭگەنى پايدالانۋعا دايىن ەكەنىن ايتقان. جاڭاشىلدىقتى ءتيىمدى ەندىرۋ ءۇشىن ەلدىڭ باس قارجى ۇيىمى حالىققا ءتۇسىندىرۋ جۇمىستارىنا باسا ءمان بەرمەكشى.