ەمحانالار مەن ستاسيونارلارداعى مەديسينالىق كومەككە قولجەتىمدىلىكتى ارتتىرۋ ماقساتىندا ق ر دەنساۋلىق ساقتاۋ مينيسترلىگى حالىقارالىق ستاندارتتارعا ساي، دياگنوستيكالىق راسىمدەردى وڭتايلاندىرۋ جۇمىستارىن جۇرگىزدى. جاڭا ستاندارتقا سايكەس، ستاسيونارعا جاتقىزىلاتىن ناۋقاستاردى ەمدەۋگە قاجەت نەگىزگى 13 زەرتتەۋ انىقتالدى. جاڭا ستاندارتتىڭ ارتىقشىلىعىن الماتىنىڭ №8 ەمحاناسىنىڭ ەپيدەميولوگ-دارىگەرى مادينا تۋاشيەۆا تارقاتىپ ايتىپ بەردى.
– ستاسيونارعا جاتقىزىلاتىن ناۋقاستاردىڭ ەمى شۇعىل جانە جوسپارلى ەم بولىپ بولىنەدى. جوسپارلى ەمدەۋگە جاتقىزۋ – بۇل شۇعىل مەديسينالىق ارالاسۋدى قاجەت ەتپەيتىن سوزىلمالى اۋرۋلار مەن ومىرگە ءقاۋىپتى ەمەس جاعدايلاردىڭ كورسەتكىشتەرى بولعان كەزدە ناۋقاستاردى ستاسيونارعا ەمدەۋگە جىبەرۋ. ستاسيونارعا الدىن الا جوسپارلى تۇردە جاتاتىن ناۋقاستار اۋەلى ءبىرقاتار زەرتحانالىق اناليزدەر تاپسىرىپ، اسپاپتىق زەرتتەۋلەردەن وتەدى. ەگەر بۇرىن بۇل تالداۋلار، زەرتتەۋلەر جانە دارىگەر-مامانداردىڭ قورىتىندىلارى 10 كۇنگە جارامدى بولسا، ەندى بۇل مەرزىم 14 كۇنگە دەيىن ۇزارتىلدى. سونىمەن قاتار، كەيبىر زەرتتەۋلەردىڭ ناتيجەلەرى 1 ايدان 6 ايعا دەيىن سوزىلادى. ياعني، بۇل ەمحانا ءۇشىن دە، ەمدەلۋشى ناۋقاس ءۇشىن دە وتە ءتيىمدى. ويتكەنى، جوسپارلى ەم الۋعا دايىندالىپ جۇرگەن ناۋقاستىڭ قاجەتتى اناليزدەرى، زەرتتەۋلەر قورىتىندىسى ستاسيونارعا جەتكەنشە ءوز كۇشىن جويىپ، ۋاقىتى ءوتىپ كەتىپ، سول اناليزدەرىن 10 كۇننەن كەيىن قايتا تاپسىرۋعا ءماجبۇر بولادى. ەنگىزىلىپ وتىرعان وزگەرىستىڭ ءبىر تيىمدىلىگى وسى. سوندىقتان بۇل جاڭا ستاندارت ناۋقاس ءۇشىن دە، ەمحانا ءۇشىن دە ءتيىمدى. ماسەلەن، ەمحانامىزدا 21 كۇن سايىن ستاسيونارعا جاتىپ ەم الاتىن ناۋقاستارىمىز ۋاقىتىن ۇنەمدەيدى، ال ەمحانا قاجەتسىز شىعىنداردان ارىلىپ، قاراجات كوزىن ءتيىمدى پايدالانادى.