الماتىدا جاڭا مەكتەپتەر اشىلىپ، پەداگوگتاردى قولداۋ باعدارلامالارى كەڭەيتىلىپ كەلەدى
الماتىدا مۇعالىمدەر كۇنىنە ارنالعان سالتاناتتى ءىس-شارا ءوتتى. قالا اكىمى دارحان ساتىبالدى قۇتتىقتاۋ سوزىندە ۇستازداردىڭ ەل دامۋىنداعى ايرىقشا ءرولىن اتاپ ءوتىپ، جاس ۇرپاقتى تاربيەلەۋدەگى ادالدىعى ءۇشىن پەداگوگتارعا العىس ءبىلدىردى، - دەپ حابارلايدى Aqshamnews.kz.
«بۇل كۇنى ءبىز بالالارعا جول سىلتەپ، ءبىلىم بەرىپ، ومىرلىك باعىت-باعدار تابۋعا كومەكتەسەتىن جاندارعا شىنايى العىس بىلدىرەمىز. ۇستاز مارتەبەسى ءبىز ءۇشىن قاشاندا ەرەكشە»، – دەدى اكىم.
ءبىلىم بەرۋ سالاسىندا ءقاۋىپسىز ورتا قالىپتاستىرۋعا ەرەكشە نازار اۋدارىلىپ وتىر. اكىمنىڭ ايتۋىنشا، الماتىدا مەكتەپ پسيحولوگتارىنىڭ جۇمىسى كۇشەيتىلىپ، بالالاردىڭ قۇقىعىن قورعاۋ جانە پسيحولوگيالىق قولداۋ ورتالىقتارى اشىلدى.
«ءار بالانىڭ داۋىسى ەسكەرىلۋى ماڭىزدى. ءبىز تەك بىرلەسكەن كۇش-جىگەردىڭ ارقاسىندا ءار وقۋشى ءوزىن ءقاۋىپسىز سەزىنەتىن ءارى قولداۋ تاباتىنىنا سەنىمدى بولاتىن ورتا قۇرا الامىز»، – دەپ اتاپ ءوتتى دارحان ساتىبالدى.
اكىم مەكتەپ ينفراقۇرىلىمىن دامىتۋعا دا توقتالدى. مۇعالىمدەر كۇنى قارساڭىندا الماتىدا «كەلەشەك مەكتەپتەرى» جوباسى اياسىندا بەس جاڭا مەكتەپ اشىلدى. جىل سوڭىنا دەيىن تاعى التاۋى ىسكە قوسىلادى. جالپى قالادا 20 زاماناۋي ءبىلىم بەرۋ مەكەمەسى پايدالانۋعا بەرىلەدى دەپ جوسپارلانعان. بۇدان بولەك، «1300 مەكتەپ» ۇلتتىق جوباسى جۇزەگە اسىرىلىپ جاتىر. ونىڭ اياسىندا 2027 جىلعا دەيىن 31 ءبىلىم ورداسى تولىق جاڭعىرتۋدان وتپەك.
«ءبىز ءارقاشان پەداگوگتاردى قولدايمىز. الماتىدا ءتورتىنشى جىل قاتارىنان «الماتى ۇستازى» بايقاۋى وتۋدە. بۇل كاسىبي دامۋعا جانە تاجىريبە الماسۋعا ارنالعان الاڭعا اينالدى. ۇزدىك ۇستازدار فينليانديا، سينگاپۋر، ەستونيا سىندى الدىڭعى قاتارلى ەلدەردىڭ مەكتەپتەرىندە تاعىلىمدامادان ءوتىپ ءجۇر. بيىل بۇل تىزىمگە جۇڭگو حالىق رەسپۋبليكاسى دا قوسىلدى»، – دەدى قالا اكىمى.
سالتاناتتى ءىس-شارانىڭ مەرەكەلىك كوڭىل-كۇيىن كونسەرتتىك باعدارلامالار تولىقتىردى. ساحنادا قازاقستاندىق ەسترادا جۇلدىزدارى، شىعارماشىل جاستار ۇجىمدارى مەن مەكتەپ انسامبلدەرى ونەر كورسەتىپ، ۇستازدارعا ارناپ ءان مەن بي تارتۋ ەتتى.
ءىس-شارا بارىسىندا ماراپاتتاۋ ءراسىمى ءوتتى. قالانىڭ ۇزدىك ۇستازدارى الماتى اكىمى اتىنان جوعارى كاسىبيلىگى، ماماندىعىنا ادالدىعى جانە ءبىلىم بەرۋ سالاسىن دامىتۋعا قوسقان ۇلەسى ءۇشىن قۇرمەت گراموتالارى مەن العىس حاتتارعا يە بولدى. ءبىرقاتار مۇعالىمگە توسبەلگى مەن قۇندى سىيلىق تابىس ەتىلدى.