الماتى اكىمى دارحان ساتىبالدى جەتىسۋ جانە تۇركسىب اۋداندارىنداعى ونەركاسىپتىك نىساندارعا بارىپ، ولاردىڭ جۇمىسىمەن، وندىرىستىك الەۋەتىمەن جانە ينۆەستيسيالىق جوسپارلارىمەن تانىستى، دەپ حابارلايدى aqshamnews.kz
الدىمەن قالا اكىمى جەتىسۋ اۋدانىندا ورنالاسقان «اسفالتوبەتون-1» جشس-نا باردى. بۇل – قالاداعى جول-قۇرىلىس ماتەريالدارىن شىعاراتىن ءىرى كاسىپورىنداردىڭ ءبىرى. مۇندا جىلىنا 1،5 ملن تونناعا دەيىن اسفالتبەتون قوسپاسى، 100 مىڭ تونناعا دەيىن مۇناي بيتۋمى، سونداي-اق بەتون قوسپالارى مەن تاس ماتەريالدارى وندىرىلەدى.
زاۋىتتا 700 ادام ەڭبەك ەتەدى. كاسىپورىن اۋماعى 26 گەكتاردى قامتيدى، ونىڭ 5 گەكتارى جاسىل جەلەككە بولىنگەن.
كەلەسى نىسان – جەتىسۋ اۋدانىندا ورنالاسقان «كەلەت» اكسيونەرلىك قوعامى. 1992 جىلى قۇرىلعان كاسىپورىن قازاندىقتار مەن سورعى بەكەتتەرىنەن باستاپ، كوممۋنالدىق سالاعا ارنالعان زاماناۋي جابدىقتارعا دەيىن كەڭ اۋقىمدى ەلەكتروتەحنيكالىق ءونىم شىعارادى.
كومپانيانىڭ جىلدىق اينالىمى شامامەن 12 ملرد تەڭگە، سونىڭ جارتىسى قازاقستاندا وندىرىلەدى. «كەلەت» ونىمدەرى ىشكى نارىقپەن قاتار رەسەي، قىرعىزستان جانە بەلارۋس ەلدەرىنە جەتكىزىلەدى.
دارحان ساتىبالدى كاسىپورىننىڭ دامۋ پەرسپەكتيۆالارىنا توقتالىپ:
«وتاندىق ءوندىرىس پەن ماشينا جاساۋ سالاسىنىڭ دامۋى الماتى ءۇشىن دە، ەلىمىز ءۇشىن دە ستراتەگيالىق ماڭىزعا يە. جۇمىسشى ماماندىقتار جىلى اياسىندا ءبىز ءوندىرىستى كەڭەيتۋگە جانە جاڭا جۇمىس ورىندارىن اشۋعا قولداۋ كورسەتۋگە دايىنبىز»، – دەدى.
تۇركسىب اۋدانىندا اكىم «Samal» زاۋىتىندا بولدى. قايتا جاڭعىرتۋدان كەيىن مۇندا 336 جۇمىس ورنى قۇرىلىپ، وندىرىستىك قۋات ايىنا 12 ملن ليتر اۋىز سۋعا دەيىن ارتقان. كاسىپورىندا زاماناۋي جابدىق ورناتىلعان، تەرەڭدىگى 250 مەتر بولاتىن ەكى ارتەزيان قۇدىعى جانە ءونىمدى جەتكىزۋگە ارنالعان اۆتوپارك جۇمىس ىستەيدى.
سوڭعى نىسان – 1989 جىلى قۇرىلعان Alina Group كومپانياسىنىڭ قۇرعاق قۇرىلىس قوسپالارى زاۋىتى. بۇگىندە بۇل – قازاقستانداعى قۇرىلىس يندۋسترياسىنىڭ جەتەكشى كاسىپورىندارىنىڭ ءبىرى. زاۋىت 1997 جىلدان بەرى AlinEX جانە «ناشي» برەندتەرىمەن ءونىم شىعارىپ كەلەدى. جىلدىق وندىرىستىك قۋاتى 315 مىڭ توننادان اسادى، بۇل الماتى مەن ەلىمىزدىڭ وڭتۇستىك وڭىرلەرىن تولىق قامتۋعا مۇمكىندىك بەرەدى.
كاسىپورىندا شامامەن 200 ادام جۇمىس ىستەيدى. ءونىم اسسورتيمەنتىنە سەمەنت پەن گيپس نەگىزىندەگى سىلاقتار، ساندىك قاپتامالار، ەدەنگە ارنالعان تەگىستەۋ قوسپالارى، جەلىمدەر جانە گيدرووقشاۋلاعىش ماتەريالدار كىرەدى. بۇل زاۋىت – بۇگىندە 18 وندىرىستىك الاڭى بار Alina Group كومپانياسىنىڭ العاشقى كاسىپورنى.
جۇمىس ساپارىنىڭ قورىتىندىسى بويىنشا اكىم جاۋاپتى قىزمەتتەرگە قالا ونەركاسىبىن ءارى قاراي قولداۋ شارالارىن پىسىقتاۋدى تاپسىردى. نەگىزگى باسىمدىق – جاڭا جۇمىس ورىندارىن اشۋعا، زاماناۋي تەحنولوگيالاردى ەنگىزۋگە جانە ەكولوگيالىق ستاندارتتاردى ساقتاۋعا بەرىلدى.