الماتى اكىمى دارحان ساتىبالدىنىڭ توراعالىعىمەن قالا اكىمدىگىندە «تازا قازاقستان» باعدارلاماسى اياسىنداعى ءىس-شارالاردىڭ ورىندالۋىنا قاتىستى جيىن ءوتتى. وندا 2025 جىلدىڭ III توقسانىندا اتقارىلعان ىستەر سارالانىپ، الداعى مەجەلەر ايقىندالدى.
شىلدە-قىركۇيەك ارالىعىندا قالادا 367 ءىس-شارا وتكىزىلىپ، وعان 337 مىڭنان استام ادام قاتىستى. 376 توننادان استام قوقىس جينالدى، شامامەن 600 گەكتار اۋماق تازارتىلىپ، 912 اعاش پەن بۇتا وتىرعىزىلدى.
سەنبىلىك ۇيىمداستىرۋعا باسا نازار اۋدارىلدى. توقسان ىشىندە 128 سەنبىلىك ءوتتى، ونىڭ ىشىندە 4 جالپىقالالىق سەنبىلىككە 40 مىڭنان استام تۇرعىن مەن ەرىكتى قاتىستى. بۇل اۋقىمدى ءىس-شاراعا 2 مىڭنان استام ارنايى تەحنيكا جۇمىلدىرىلىپ، 20 مىڭ تەكشە مەتردەن استام قوقىس شىعارىلدى.
27 قىركۇيەكتە مەكتەپتەر مەن بالاباقشا ۇجىمدارى، مەديسينالىق ۇيىمدار، بيزنەس وكىلدەرى جانە قالا تۇرعىندارى قاتىسقان كەڭ اۋقىمدى جالپىقالالىق سەنبىلىك ءوتتى. اكسياعا 4 مىڭعا جۋىق ادام مەن 143 ارنايى تەحنيكا تارتىلىپ، ءبىر كۇندە 1،6 مىڭ تەكشە مەتردەن استام قوقىس جينالىپ شىعارىلدى.
سونىمەن قاتار قىركۇيەك ايىندا 100 مىڭ بۇتا وتىرعىزۋ بويىنشا جۇمىستار باستالدى. بۇگىندە 4 مىڭنان استام وسىمدىك ەگىلدى، شامامەن 7 مىڭ ويىق دايىندالدى. وتىرعىزىلعان كوشەتتەردى «لۋكومورە» ءتالىمباعى جەتكىزسە، ولاردىڭ ساپاسىن باس بوتانيكالىق ب ا ق ماقۇلدادى.
اۋداندىق كورسەتكىشتەر بويىنشا ۇزدىكتەر قاتارىنان الاتاۋ اۋدانى وزىق شىقسا، مەدەۋ، ناۋرىزباي جانە تۇركسىب اۋداندارى دا جوعارى ناتيجەسىمەن كوزگە ءتۇستى.
دارحان ساتىبالدىنىڭ ايتۋىنشا، «تازا قازاقستان» بۇگىندە جاي عانا ەكولوگيالىق جوبا ەمەس، قالا تۇرعىندارىن ورتاق ىسكە جۇمىلدىراتىن قۋاتتى قوزعالىسقا اينالدى. اكىم الداعى ۋاقىتتا بارلىق اۋداننىڭ قاتىسۋىمەن ەكولوگيالىق ايلىق وتكىزۋدى ۇسىندى.
«قالانىڭ تازالىعى ءبىزدىڭ مادەنيەتىمىزدىڭ، بولاشاققا دەگەن قۇرمەتىمىزدىڭ ايناسى. ەڭ باستىسى، وسى قارقىندى باسەڭدەتپەي، تۇرعىندارمەن، كاسىپكەرلەرمەن، قوعامدىق ۇيىمدارمەن بىرگە تىزە قوسىپ ەڭبەك ەتۋ»، – دەدى الماتى اكىمى.