زاڭدا جانە پارلامەنت رەگلامەنتتەرىندە دەپۋتاتتىڭ جۇمىسىنا ناقتى تالاپتار قويىلعان.
Aqshamnews.kz رەداكسياسى وسى جاعدايعا قاتىستى جولداعان رەسمي ساۋالعا ق ر پرەزيدەنتى ءىس باسقارماسى جاۋاپ بەردى. رەسمي مالىمەتكە سايكەس، دەپۋتاتتىڭ جالاقىسى مەن پارلامەنتتىك ءسوز سويلەۋ قۇقىعىنان قانداي جاعدايدا ايىرىلاتىنى زاڭمەن جانە پارلامەنت رەگلامەنتتەرىمەن ناقتى رەتتەلگەن.
ەگەر ول:
- پارلامەنت نەمەسە پالاتا وتىرىسىنا ءۇش رەتتەن ارتىق دالەلسىز سەبەپپەن كەلمەسە، بولماعان كۇندەرگە جالاقى تولەنبەيدى؛
- باسقا دەپۋتات ءۇشىن زاڭسىز داۋىس بەرسە – ايلىق جالاقىسىنان تولىقتاي ايىرىلۋى مۇمكىن؛
- داۋىس بەرۋ قۇقىعىن بۇزعانى انىقتالسا – داۋىستى رۇقساتسىز بەرگەن كۇنىنە جالاقى تولەنبەيدى.
قانداي جاعدايدا دەپۋتات سوزدەن ايىرىلادى؟
سەنات پەن ءماجىلىس رەگلامەنتتەرىنە سايكەس سەنات دەپۋتاتى ءوزى سايلانعان پارلامەنتتىڭ، پالاتانىڭ جانە ولاردىڭ ورگاندارىنىڭ جۇمىسىنا قاتىسۋعا مىندەتتى، ال ءماجىلىس دەپۋتاتى ءوزى سايلانعان پارلامەنتتىڭ، پالاتانىڭ جانە ولاردىڭ ورگاندارىنىڭ، سونداي-اق پارلامەنتتىك تىڭداۋلاردىڭ، ۇكىمەتتىك ساعاتتار مەن جۇمىس توپتارىنىڭ جۇمىسىنا قاتىسۋعا مىندەتتى.
بەلگىلەنگەن رەگلامەنتتەر بۇزىلعان جاعدايدا ءتيىستى پالاتا ءتوراعاسىنىڭ شەشىمىمەن دەپۋتاتقا كەلەسىدەي جازالاۋ شارالارى قولدانىلۋى مۇمكىن:
- پارلامەنتتىك ايىپتاۋ؛
- كوپشىلىك الدىندا كەشىرىم سۇراۋعا ماجبۇرلەۋ؛
- پالاتالاردىڭ ءبىر بىرلەسكەن نەمەسە بولەك وتىرىسى ىشىندە سوزدەن ايىرۋ؛
- پالاتالاردىڭ ءۇش بىرلەسكەن نەمەسە بولەك وتىرىسى ىشىندە سوزدەن ايىرۋ؛
- پالاتالاردىڭ ءبىر بىرلەسكەن نەمەسە بولەك وتىرىسى ۋاقىتىندا ءماجىلىس زالىنان شىعارۋ؛
- پالاتالاردىڭ ءۇش بىرلەسكەن نەمەسە بولەك وتىرىسى ۋاقىتىنا ءماجىلىس زالىنان شىعارۋ؛
- ءبىر كۇندىك جالاقىدان ايىرۋ.
ەسكە سالا كەتەيىك، بۇعان دەيىن 2026 جىلى پارلامەنتتى ۇستاۋعا 7،8 ملرد تەڭگە بولىنەتىنىن جازعان ەدىك.