2025 جىلعى 2 قازاندا قازاق ۇلتتىق قىزدار پەداگوگيكالىق ۋنيۆەرسيتەتىندە سيفرلىق ءبىلىم بەرۋدى جاڭا دەڭگەيگە كوتەرۋگە باعىتتالعان ماڭىزدى باستاما جۇزەگە استى.
ۋنيۆەرسيتەت جانىنداعى Digital Lady تەحنوپاركىندە ءۇش بىردەي زاماناۋي زەرتحانا – «Apple class»، «3D Lab» جانە «اتومدىق جانە يادرولىق فيزيكا» زەرتحانالارى سالتاناتتى تۇردە اشىلدى، - دەپ حابارلايدى Aqshamnews.kz.
بۇل جوبالار مەملەكەت باسشىسى قاسىم-جومارت توقايەۆتىڭ بيىلعى جولداۋىندا ايتىلعان سيفرلاندىرۋ مەن جاساندى ينتەللەكتتى ەنگىزۋ جونىندەگى ستراتەگيالىق ماقساتتارمەن تولىق ۇندەسىپ وتىر.
زەرتحانالاردىڭ اشىلۋ سالتاناتىنا پرەزيدەنت جانىنداعى ۇلتتىق عىلىم اكادەمياسى ديرەكتورلار كەڭەسىنىڭ تاۋەلسىز ديرەكتورى، اكادەميك، ۇلتتىق قۇرىلتاي مۇشەسى كارىمبەك ارىستانبەك ۇلى قۇرمانالييەۆ، اقپاراتتىق جانە ەسەپتەۋ تەحنولوگيالارى ينستيتۋتىنىڭ باس ديرەكتورى، ق ر ۇيا اكادەميگى، پروفەسسور، ف.-م.ع.د. ماقتاعالي ءابدىماجيت ۇلى بەكتەمىسوۆ، ITeacher Academy نەگىزىن قالاۋشى، Apple Authorized Reseller يۋليا اندرەيەۆا، QyzPU پروفەسسورلىق-وقىتۋشىلىق قۇرامى قاتىستى.
QyzPU رەكتورىنىڭ مىندەتىن اتقارۋشى ءسابيت سۋاتايدىڭ ايتۋىنشا، جاڭا زەرتحانالاردىڭ ستۋدەنتتەرگە بەرەتىن مۇمكىندىكتەرىنە توقتالدى.
«قازىرگى زاماندا ءبىلىم بەرۋ جۇيەسى تەك تەوريامەن شەكتەلىپ قالماي، تاجىريبە مەن تەحنولوگيانى ۇيلەستىرۋدى تالاپ ەتەدى. بۇگىنگى تاڭدا اشىلىپ وتىرعان زەرتحانالار – وسى باعىتتاعى ناقتى قادامىمىز. ولار ستۋدەنتتەرگە زاماناۋي قۇرالدارمەن جۇمىس ىستەۋ، ءوز يدەيالارىن پروتوتيپكە اينالدىرۋ، سيفرلىق ورتادا ەركىن ارەكەت ەتۋ سەكىلدى ماڭىزدى داعدىلاردى مەڭگەرۋگە جول اشادى. Digital Lady تەحنوپاركىنىڭ نەگىزىندە قۇرىلعان Apple class، 3D Lab جانە «اتومدىق جانە يادرولىق فيزيكا» زەرتحانالارى وقۋ مازمۇنىن تاجىريبەمەن ۇشتاستىرا وتىرىپ، capstone-جوبالار مەن عىلىمي زەرتتەۋلەرگە نەگىز بولماق. سونىمەن قاتار بۇل زەرتحانالار حالىقارالىق حاكاتوندارعا، ستارتاپتىق باعدارلامالارعا قاتىسۋعا، حالىقارالىق سەرىكتەستىكتەرمەن بىرلەسكەن جوبالار جۇرگىزۋگە مۇمكىندىك بەرەدى»، – دەدى ءسابيت قۇرمانجان ۇلى.
«اتومدىق جانە يادرولىق فيزيكا» زەرتحاناسى – ستۋدەنتتەرگە اتوم يادروسىنىڭ قۇرىلىمى مەن قاسيەتتەرىن تەرەڭ تۇسىنۋگە مۇمكىندىك بەرەتىن عىلىمي ورتالىق. زەرتحانا «رەزونانستىق پوتەنسيالدى فرانك جانە گەرس ادىسىمەن انىقتاۋ»، «زەەمان ەففەكتىسى»، «ەكى ەلەكتروندى جۇيەلەردىڭ اتومدىق سپەكترلەرى: He، Hg»، «فوتوەففەكت كومەگىمەن پلانك تۇراقتىسىن انىقتاۋ»، «بالمەر سەرياسى»، «ريدبەرگ تۇراقتىسىن انىقتاۋ» سياقتى اتومدىق فيزيكانىڭ ماڭىزدى تاقىرىپتارىن قامتيتىن زەرتتەۋلەر جۇرگىزۋگە مۇمكىندىك بەرەدى. مۇندا جاس عالىمدار مەن ستۋدەنتتەر پراكتيكالىق تاجىريبە الىپ، يادرولىق فيزيكا سالاسىنداعى زەرتتەۋلەر جۇرگىزە الادى.
«8 قىركۇيەكتەگى جولداۋدا قاسىم‑جومارت توقايەۆ اتوم ەلەكتر ستانسيالارىنىڭ (اەس) ماڭىزدىلىعىن اتاپ ءوتىپ، ەلىمىزدىڭ ەنەرگەتيكالىق جۇيەسىن كۇشەيتۋ ماقساتىندا: قازاقستاندا ەكىنشى، ءتىپتى ءۇشىنشى اەس سالۋدى جوسپارلاۋدى باستاۋ قاجەت ەكەنىن ايتقان بولاتىن. بۇل ەلىمىزدىڭ ەكونوميكالىق تۇراقتىلىعىن قولداۋ، ەلەكتر ەنەرگياسىنا سۇرانىستى قامتاماسىز ەتۋ، ەنەرگيا قاۋىپسىزدىگىن كۇشەيتۋگە باعىتتالعانىن تۇسىنەمىز. بۇرىن ساباقتا ءار ءتۇرلى ۆيدەولار ارقىلى عانا كورسەتسەك، قازىرگى تاڭدا ناقتى قۇرالدار كومەگىمەن كورسەتە الامىز»، – دەدى حيميا عىلىمدارىنىڭ كانديداتى، دوسەنت تۇگەلبايەۆا گۇلنازيا.
«3D Lab» زەرتحاناسى – عىلىمي-زەرتتەۋ جانە تاجىريبەلىك جوبالاردىڭ جاڭا الاڭى. ول ۆيرتۋالدى جانە تولىقتىرىلعان شىنايىلىق (VR/AR) قۇرىلعىلارىمەن، ينجەنەرلىك جوبالاۋعا ارنالعان پروگراممالارمەن جابدىقتالعان. زەرتحانا ستۋدەنتتەرگە ۇشولشەمدى مودەلدەۋ، عىلىمي وبەكتىلەردى جوبالاۋ، ۆيرتۋالدى تاجىريبەلەر جۇرگىزۋ جانە ءوز ستارتاپ يدەيالارىن تاجىريبەدە جۇزەگە اسىرۋعا مۇمكىندىك بەرەدى. بۇل زەرتحانا بولاشاق مامانداردى زەرتتەۋشى، جاڭاشىل تۇلعا رەتىندە قالىپتاستىرۋعا باعىتتالعان يننوۆاسيالىق ورتا بولىپ تابىلادى.
«3D Lab زەرتحاناسىندا ءبىلىم الۋشىلار وندىرىستە قولدانىلاتىن قوسالقى بولشەكتەردىڭ 3D ۇلگىلەرىن ازىرلەي الادى. الەۋمەتتىك جوبالارعا مىسال رەتىندە، ەستۋ نەمەسە كورۋ قابىلەتى زاقىمدانعان بالالارعا ارنالعان وقۋ قۇرالدارىنىڭ 3D ۇلگىلەرىن دايىنداۋدى كەلتىرسەك بولادى.
جاساندى ينتەللەكت سالاسىنداعى زەرتحانالىق جۇمىستاردا الىنعان تاجىريبە ستۋدەنتتەردىڭ ەڭبەك نارىعىندا بىردەن بەيىمدەلۋىن قامتاماسىز ەتەدى»، – دەدى پەداگوگيكا عىلىمدارىنىڭ دوكتورى، پروفەسسور سەرىك كەڭەسبايەۆ.
«Apple class» زەرتحاناسى – سيفرلىق ءبىلىم بەرۋدىڭ جاڭا ورتالىعى. زەرتحانا تولىقتاي iMac جانە iPad قۇرىلعىلارىمەن، زاماناۋي مۋلتيمەديالىق جابدىقتارمەن جانە ينتەراكتيۆتى سمارت-پانەلمەن قامتىلعان. مۇندا ستۋدەنتتەر قولدانبالى پروگراممالاۋ، ءموبيلدى قوسىمشالار جاساۋ، كرەاتيۆتى جوبالاردى ازىرلەۋ جانە گرافيكالىق ديزاين نەگىزدەرىن مەڭگەرەدى. سونىمەن قاتار زەرتحانادا Apple Teacher جانە باسقا حالىقارالىق وقۋ باعدارلامالارى بويىنشا وقىتۋشىلار مەن ستۋدەنتتەردى سەرتيفيكاتتاۋ مۇمكىندىگى قاراستىرىلعان.
«زەرتحانا Apple ەكوجۇيەسىندەگى زاماناۋي قۇرىلعىلارمەن جۇمىس ىستەۋگە ارنالعان قازاقستانداعى العاشقى تولىققاندى ورتالىقتاردىڭ ءبىرى. مۇندا ءبىلىم الۋشىلار تەك تەحنيكالىق داعدىلاردى عانا ەمەس، سونىمەن قاتار شىعارماشىلىق قابىلەتتەرىن دامىتۋعا مۇمكىندىك الادى. ەكىنشىدەن، Apple Lab سيفرلىق ساۋاتتىلىقتى جاڭا دەڭگەيگە كوتەرىپ، ءبىلىم الۋشىلاردى ءموبيلدى قوسىمشا جاساۋ، مۋلتيمەديا ونىمدەرىن ازىرلەۋ، گرافيكالىق ديزاين جانە انيماسيا سياقتى باعىتتارعا تارتادى. بۇل زەرتحانا ءبىلىم بەرۋدى حالىقارالىق ستاندارتتارعا جاقىنداتاتىن الاڭ رەتىندە قىزمەت اتقارادى دەپ سەنەمىن، سەبەبى Apple ونىمدەرى الەمنىڭ الدىڭعى قاتارلى ۋنيۆەرسيتەتتەرى مەن كومپانيالارىندا كەڭىنەن قولدانىلادى»، – دەدى ينفورماتيكا كافەدراسىنىڭ اعا وقىتۋشىسى، PhD ايگۇل ماحانوۆا.
ۋنيۆەرسيتەت رەكتورىنىڭ م.ا. ءسابيت سۋاتاي الداعى ۋاقىتتا ۋنيۆەرسيتەت سيفرلىق ترانسفورماسياعا باسىمدىق بەرەتىنىن اتاپ ءوتتى.
«ءبىز ۋنيۆەرسيتەتتىڭ سيفرلىق ترانسفورماسيا ستراتەگياسىن جۇزەگە اسىرۋدا دەرەكتەرگە نەگىزدەلگەن باسقارۋ، يننوۆاسيالىق ەكوجۇيە قالىپتاستىرۋ جانە كادرلاردى ناقتى ەڭبەك نارىعىنا بەيىمدەۋگە باسىمدىق بەرىپ وتىرمىز. جاڭا زەرتحانالار – بۇل تەك ينفراقۇرىلىم ەمەس، سونىمەن قاتار ستۋدەنتتەرىمىزدىڭ شىعارماشىلىعىن، ينجەنەرلىك ويلاۋىن، كاسىپكەرلىك الەۋەتىن دامىتاتىن ورتا. ولار ستۋدەنتتەردىڭ پورتفوليوسىنا ناقتى ءونىم مەن جوبا اكەلەتىن، ەڭبەك نارىعىندا باسەكەگە قابىلەتتى مامان رەتىندە قالىپتاسۋىنا تىكەلەي اسەر ەتەتىن الاڭعا اينالادى. ءبىز الداعى ۋاقىتتا Apple، Autodesk، DAAD، Erasmus+ سەكىلدى حالىقارالىق ۇيىمدارمەن سەرىكتەستىكتى نىعايتا وتىرىپ، ءبىلىم بەرۋ مازمۇنىن جاڭعىرتۋعا جانە ونى ادىستەمەلىك تۇرعىدا ەكسپورتتاۋعا دايىنبىز. ۋنيۆەرسيتەتىمىزدىڭ جاڭا بۋىنعا باعىتتالعان بۇل باستامالارى ەلىمىزدىڭ ءبىلىم بەرۋ سالاسىنىڭ دامۋىنا سەرپىن بەرەدى دەپ سەنەمىز»، – دەدى ول.