رەسپۋبليكا كۇنىنە وراي الماتىدا مەملەكەتتىك ناگرادالاردى سالتاناتتى تۇردە تابىستاۋ ءراسىمى ءوتتى. قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ اتىنان ماراپاتتاردى الماتىلىقتارعا قالا اكىمى دارحان ساتىبالدى تابىس ەتتى.
ماراپات يەلەرى قاتارىندا قالا مەن ەلدىڭ دامۋىنا زور ۇلەس قوسقان ازاماتتار بار. ولاردىڭ ىشىندە دارىگەرلەر مەن ۇستازدار، مادەنيەت جانە كاسىپكەرلىك سالاسىنىڭ وكىلدەرى، ەڭبەك ارداگەرلەرى مەن قوعام بەلسەندىلەرى بار.
سالتاناتتى جيىن بارىسىندا دارحان ساتىبالدى رەسپۋبليكا كۇنى – ەل بىرلىگى مەن تۇتاستىعىنىڭ، رۋحاني قۋاتى مەن ۇرپاقتار ساباقتاستىعىنىڭ نىشانى ەكەنىن اتاپ ءوتتى.
"تاۋەلسىزدىكتىڭ العاشقى جىلدارىنان باستاپ قازاقستان ەكونوميكا، عىلىم مەن ءبىلىم، دەنساۋلىق ساقتاۋ، مادەنيەت جانە ديپلوماتيا سالالارىندا نىق ءارى سەنىمدى قاداممەن العا باستى. بۇگىندە ەلىمىز حالىقارالىق ارەنادا بەدەلدى، تەڭ قۇقىقتى ارىپتەسكە اينالدى. تاۋەلسىزدىك جىلدارىنداعى بارلىق جەتىستىكتىڭ نەگىزىندە – حالقىمىزدىڭ ەڭبەگى جاتىر. سوندىقتان ءاربىر دارىگەرگە، ۇستازعا، ينجەنەرگە، كاسىپكەرگە جانە ءاربىر الماتىلىققا العىسىم شەكسىز"، – دەدى الماتى اكىمى.
دارحان ساتىبالدىنىڭ ايتۋىنشا، مەملەكەت باسشىسىنىڭ باستامالارى قازاقستاندى جاڭعىرتۋ ۇدەرىسىنە تىڭ سەرپىن بەرىپ وتىر. "ادىلەتتى قازاقستان"، "زاڭ مەن ءتارتىپ"، "تازا قازاقستان"، "ادال ازامات" باعدارلامالارى قوعامدا ادىلدىك، ءتارتىپ پەن سەنىمدى نىعايتۋعا باعىتتالعانىن ايتتى.
مەملەكەت باسشىسىنىڭ جارلىعىمەن اقىن مارفۋعا ايتحوجاعا "قازاقستاننىڭ حالىق جازۋشىسى" قۇرمەتتى اتاعى بەرىلدى. قازاق راديوسىنىڭ ارداگەرى امانجان سەرىكوۆ "قازاقستاننىڭ ەڭبەك سىڭىرگەن قايراتكەرى" اتاندى، ال تەراپيەۆت نۇرزيا داۋرەنبەكوۆاعا "قازاقستاننىڭ ەڭبەك سىڭىرگەن دارىگەرى" اتاعى تابىستالدى.
سونىمەن قاتار ەڭبەك ارداگەرى ەسەنتاي تاجييەۆكە "بارىس" وردەنىنىڭ ءىى دارەجەسىمەن ماراپاتتالدى. 19 الماتىلىق "قۇرمەت" وردەنىن، ەكى ازامات "ەڭبەك داڭقى" وردەنىنىڭ ءىىى دارەجەسىن، ال ءۇش تۇرعىن "پاراسات" وردەنىن يەلەندى. "ەرەن ەڭبەگى ءۇشىن" مەدالىمەن 45 ادام، ال قوعامدىق جانە قايىرىمدىلىق قىزمەتتەگى بەلسەندىلىگى ءۇشىن التى ازامات "شاپاعات" مەدالىمەن ماراپاتتالدى.
ايتا كەتەيىك، راسىمگە قازاقستان حالقى اسسامبلەياسىنىڭ، قوعامدىق كەڭەستىڭ، جوعارى وقۋ ورىندارىنىڭ، مادەنيەت جانە جاستار ۇيىمدارىنىڭ وكىلدەرى قاتىستى.