الماتى قالاسىنىڭ اكىمى دارحان ساتىبالدى مەدەۋ اۋدانىنا جۇمىس ساپارى كەزىندە ءبىرقاتار ينفراقۇرىلىمدىق نىسانداردى ارالادى، - دەپ حابارلايدى Aqshamnews.kz.
ساپار بارىسىندا سۋمەن جابدىقتاۋ، توتەنشە جاعدايلاردىڭ سالدارىن جويۋ، قوعامدىق كەڭىستىكتەردى اباتتاندىرۋ جانە قالالىق ورتانى ساۋلەتتىك تۇرعىدا كوركەيتۋ جوبالارىنا ەرەكشە نازار اۋدارىلدى.
قالا باسشىسى «كامەنسكوە پلاتو» شاعىناۋدانىندا «بالقاش» تازا سۋ رەزەرۆۋارىنان «مۋزتاۋ» شاعىناۋدانىنا دەيىنگى جەلىلەردىڭ قۇرىلىسى بارىسىمەن تانىستى. جوبا 7 مىڭنان استام تۇرعىندى سۋمەن قامتۋعا باعىتتالعان. الماتى اكىمى جۇمىستى بەلگىلەنگەن مەرزىمدە اياقتاۋدى جانە بارلىق كەزەڭدەردىڭ ساپاسىن باقىلاۋدى تاپسىردى.
دارحان ساتىبالدى «تاۋ-سامال» شاعىناۋدانىندا 2024 جىلعى اقپانداعى كوشكىننىڭ سالدارىن جويۋ شارالارىنىڭ ورىندالۋىن تەكسەردى. قالا باسشىسى اپاتتى-قالپىنا كەلتىرۋ جۇمىستارىن اعىمداعى جىلدىڭ سوڭىنا دەيىن قاۋىپسىزدىك تالاپتارىن ساقتاي وتىرىپ، اياقتاۋدى تاپسىردى.
تۇرعىندار مەن ەكو-بەلسەندىلەرمەن اشىق ديالوگ ءوتتى.
دارحان ساتىبالدى بۇل جەرلەردىڭ كوممۋنالدىق مەنشىككە قايتارىلاتىنىن اتاپ ءوتتى، قازىرگى تاڭدا ولاردى قالا مەنشىگىنە بەرۋ ءراسىمى ءجۇرىپ جاتىر.
تالقىلاۋعا مەدەۋ اۋدانىنىڭ اكىمى دە قاتىستى. اۋدان باسشىسى قالپىنا كەلتىرۋ جۇمىستارىنىڭ بارىسى، مەردىگەر ۇيىمدارمەن ءوزارا ءىس-قيمىل جانە اباتتاندىرۋ شارالارى تۋرالى باياندادى. قالا اكىمىنىڭ قاتىسۋىمەن تۇرعىنداردىڭ سۇراقتارىنا ناقتى جاۋاپتار بەرىلدى.
«تەررەنكۋر-2» ساياباعى اۋماعىندا قالا اكىمى رەكرەاسيالىق ايماقتىڭ قايتا جوندەۋ جۇمىستارىمەن تانىستى. جوبا اياسىندا زاماناۋي سەرۋەندەۋ باعىتتارى، توعاندى اباتتاندىرۋ، امفيتەاتر ورناتۋ جانە تۋريستىك ينفراقۇرىلىمدى دامىتۋ قاراستىرىلعان. مەردىگەر ۇيىمدارعا جۇمىس كەستەسىن قاتاڭ ساقتاۋ تاپسىرىلدى.
اباتتاندىرۋ اياسىندا ءال-فارابي داڭعىلى بويىنداعى تۇرعىن ۇيلەردىڭ قاسبەتتەرىنە ساۋلەتتىك جارىقتاندىرۋ جوباسى تانىستىرىلدى. جۇمىستار كەزەڭ-كەزەڭىمەن جۇرگىزىلۋدە. قالا اكىمى بىركەلكى ساۋلەتتىك ءستيلدى، قىزمەتتەردىڭ كەلىسىلگەن جۇمىسىن جانە تۇرعىنداردىڭ جارىقتاندىرۋ بويىنشا ۇسىنىستارىن ەسكەرۋدى تاپسىردى.
سونداي-اق، مەگاپوليس باسشىسى دوستىق داڭعىلى مەن پۋشكين كوشەسىنىڭ بويىنداعى جاياۋ جۇرگىنشى جانە كولىك ينفراقۇرىلىمىن اباتتاندىرۋ جوبالارىمەن تانىستى. قولجەتىمدى ورتا قالىپتاستىرۋ جانە قۇرىلىس ستاندارتتارىنىڭ ساقتالۋىن باقىلاۋ بويىنشا جەكە تاپسىرما بەرىلدى.
جۇمىس ساپارىنىڭ قورىتىندىسى بويىنشا دارحان ساتىبالدى سالالىق باسقارمالار مەن اۋدان اكىمىنە ءبىرقاتار تاپسىرمالار بەردى – حالىقپەن تۇراقتى كەرى بايلانىستى قامتاماسىز ەتۋ، اتقارىلىپ جاتقان جۇمىستار تۋرالى ۋاقتىلى اقپارات بەرۋ جانە ازاماتتاردىڭ وتىنىشتەرىنە جەدەل ارەكەت ەتۋ.