الماتى اكىمى دارحان ساتىبالدى جۇمىس ساپارى اياسىندا قالانىڭ جول، ينجەنەرلىك جانە الەۋمەتتىك ينفراقۇرىلىمىنىڭ دامۋ بارىسىمەن تانىستى.
قالالىق موبيلدىلىك باسقارماسىنىڭ باسشىسى ساعىندىق تەلىبايەۆ شاھار اكىمىنە رىسقۇلوۆ داڭعىلى مەن جۇبانوۆ كوشەسىندەگى قۇرىلىستىڭ بارىسى تۋرالى ەسەپ بەردى. ماسەلەن، رىسقۇلوۆ داڭعىلىن وڭعارسىنوۆا كوشەسىنەن قالا شەكاراسىنا دەيىن ۇزارتۋ جوباسى تروتۋارلار مەن ۆەلوجولدار بار التى جولاقتى جولدى قامتيدى. ونىڭ جالپى ۇزىندىعى 2،3 شاقىرىم. نىساننىڭ قۇرىلىسىنا بولىنگەن شەكارالارعا 220 جەر ۋچاسكەسى كىرەدى، ونىڭ 183ء-ى ساتىپ الىنعان. جۇبانوۆ كوشەسىن مومىش ۇلى كوشەسىنەن قالا شەكاراسىنا دەيىن ۇزارتۋ جۇمىستارى دا جەر ۋچاسكەلەرىن ساتىپ الۋعا بايلانىستى جۇرگىزىلۋدە. جولدىڭ جالپى ۇزىندىعى 3،9 شاقىرىم. بۇگىندە 365 جەر ۋچاسكەسىنىڭ 120-سى ساتىپ الىندى.
«ماگيسترالدىق جانە راديالدى كوشەلەردى ۇزارتۋ اياسىندا جەر ۋچاسكەلەرىن ساتىپ الۋ بويىنشا جۇمىستاردى جەدەلدەتۋ قاجەت، ويتكەنى جۇمىستاردى ورىنداۋ كەستەسى اۋماقتاردى ۋاقىتىلى بوساتۋعا بايلانىستى. بۇل قالا ءۇشىن ماڭىزدى جوبالار. سونىڭ ارقاسىندا اۋداندار اراسىنداعى بايلانىس جاقسارادى جانە كولىك جۇكتەمەسى ازايادى»، - دەپ اتاپ ءوتتى دارحان ساتىبالدى.
جۇمىس ساپارى بارىسىندا الماتى اكىمى شۇعىلا شاعىناۋدانىنىڭ تۇرعىندارىمەن كەزدەستى. ولار ەلەكتر جەلىلەرىنىڭ جەكە مەنشىكتە بولۋى سالدارىنان ءبىرقاتار كوشەلەردە جارىق ءجيى ءسونىپ قالاتىنىن ايتتى.
ەنەرگەتيكا جانە سۋمەن جابدىقتاۋ باسقارماسى قالا اكىمىنە اتالعان شاعىن اۋداندا 11،2 شاقىرىم كابەلدىك جەلى سالىنىپ، ەكى ترانسفورماتورلىق قوسالقى ستانسيا ورناتىلعانىن باياندادى. بۇگىندە ترانسفورماتورلاردى ىسكە قوسۋ جانە ەلەكتر ەنەرگياسىن ەسەپتەۋ قۇرالدارىن ورناتۋ جۇمىستارى جۇرگىزىلۋدە. بيىل قاراشا ايىندا جۇمىستى تولىق اياقتاۋ جوسپارلانىپ وتىر.
سونىمەن قاتار، قالا اكىمى ناۋرىزباي اۋدانىنداعى № 174 مەكتەپ-گيمنازيا جانىنا سالىنعان قوسالقى نىساندى دا ارالاپ كوردى. ءۇش قاباتتى 350 باستاۋىش سىنىپ وقۋشىلارىنا ارنالعان عيمارات ينتەراكتيۆتى كابينەتتەرمەن، بارلىق قاجەتتى قۇرىلعىلارمەن جابدىقتالعان. نىسان وسى جىلدىڭ قازان ايىندا تولىق اياقتالادى.