الماتى زووباعىندا كوپتەن كۇتكەن قۋانىشتى وقيعا بولدى – 6 جاستاعى بەنتلي مەن 5 جاستاعى ايكي ەسىمدى امۋر جولبارىستارىنىڭ جۇبىنان ەكى ەركەك جولبارىس كۇشىگى دۇنيەگە كەلدى. بۇل – سوڭعى جىلدارداعى العاشقى ءتول جانە قىزىل كىتاپقا ەنگەن سيرەك ءتۇردى ساقتاۋعا قوسىلعان ماڭىزدى ۇلەس. بۇل تۋرالى الماتى قالاسىنىڭ مادەنيەت باسقارماسى حابارلادى.
امۋر جولبارىسى جويىلىپ كەتۋ ءقاۋپى بار تۇرگە جاتادى. سوندىقتان مۇنداي جانۋارلاردىڭ زووباق جاعدايىندا كوبەيۋى گەنەتيكالىق الۋاندىقتى ساقتاۋدا جانە پوپۋلياسيانى قورعاۋدا اسا ماڭىزدى ءرول اتقارادى.
جولبارىستار جۇبىن قالىپتاستىرۋ وڭاي ەمەس: تابيعاتىنان ولار – جالعىز جۇرەتىن جىرتقىشتار. زووباق ماماندارى جولبارىس سەرىگىن مۇقيات تاڭداپ، ۆولەردى دايىنداپ، جانۋارلار وزدەرىن ءقاۋىپسىز سەزىنەتىن جاعداي جاسادى. سونىڭ ارقاسىندا ساۋ ءتول الۋعا مۇمكىندىك تۋدى.
جولبارىس كۇشىكتەرى 14 ماۋسىمدا دۇنيەگە كەلىپ، العاشقى ايلارىن ارنايى تىنىش ايماقتا وتكىزدى. بۇل – شۋ مەن سىرتقى دىبىس پەن كوزگە تۇسەتىن اسەرلەردى ازايتاتىن ارنايى ۆولەر. مۇنداي جاعداي انالىق جولبارىستىڭ كۇيزەلىسىن تومەندەتىپ، ءتولدىڭ دۇرىس دامۋىنا قاجەت.
«امۋر جولبارىستارىنىڭ انالىقتارى وتە مىقتى انالىق تۇيسىگى بار جانە وقشاۋلانۋدى قاجەت ەتەدى. العاشقى ايلاردا ءتولىن قورعاۋ ءۇشىن كەز كەلگەن سىرتقى دىبىس پەن كوزگە تۇسەتىن اسەرلەرگە اسا سەزىمتال بولادى. سوندىقتان ءبىز وعان اكۋستيكالىق جانە ۆيزۋالدىق اسەرى تومەن ورتا جاسادىق. ءۇش ايعا دەيىن جولبارىس كۇشىكتەرى «سەزىمتال كەزەڭنەن» ءوتتى. بۇل ۋاقىتتا ارتىق دىبىس پەن ءيىس انالىقتىڭ مازاسىزدانۋىنا، سونىڭ سالدارىنان ءتولدىڭ دامۋىنا اسەر ەتۋى مۇمكىن. وسى ۋاقىت بويى وتباسى كۇندەلىكتى ۆەتەرينارلىق باقىلاۋدا بولدى. ءقازىر كارانتين اياقتالدى، كۇشىكتەردىڭ جاعدايى جاقسى، ناعىز جولبارىسقا ءتان قىلىقتارىن كورسەتە باستادى»، – دەدى زووباقتىڭ باس ۆەتەرينارلىق دارىگەرى ۆيتاليي ساچكوۆ.
الداعى دەمالىس كۇندەرى اناسىمەن بىرگە جولبارىس كۇشىكتەرى جاڭا ۆولەرگە كوشىرىلەدى. وندا كەلۋشىلەر الماتى زووباعىنىڭ جاڭا تۇرعىندارىمەن تانىسا الادى.